Dem Erwi <r> rdigen[n] [in]n Got unserm lieben besondernn Freundt und Nachbarn, h[ern]n Johansen bischovenn zw Ermelandt etc.

Unnser freuntlich dienst zuvorn.

Erwidiger inn Got besonnder lieber Freundt und Nachbar.

Wess ann unns Melchior Molbach vonn der Gutstat supplicirennde gelangenn, / auch danebenn bittenn lassenn, / werdenn Euer Lieb aus einverwarter abschriefft seyner supplication zur notturfft vernemen. / Dieweyl wir dann dess armen mannes bittenn nicht unbillich vormerckenn, / so habenn wir ime eine vorschriefft ann Euer Lieb damit der hanndel zur geburenden vorhor gelangen mochte / unnd er sich als einer, / welcher unvorhorter sachenn / vorwiesenn nicht zubeschwerenn / nicht weygern mogenn. /

Ist demnach ann Euer Lieb unnser freuntlichs bittenn, / wo der [ha]nndel zuvor gnugsam / nicht verhoret ... wollen dennselben nochmals vorne[m]... ...en lassenn / unnd gegenn dem armenn manne mit gleit un...nndern dermassenn haltenn unnd erzeygenn, / damit er sich mit billigkeit (darann wir dann keyn zweÿvell tragenn) nicht zubeclagenn habe / ime auch inn seynenn rechtenn sachenn dieser unnser vorschriefft geniessenn lassenn. /

Das seint wir umb Euer Lieb (welche wir hiemit dem s[ch]utz dess Allerhochstenn bevelhenn thun) inn mererm zubeschuldenn unnd zuvordienenn urbutigk. /

Datum Konigspergk, denn V Maii anno etc. im XLVI-sten.

Vonn Gotts gnadenn Albrecht marggraff zw Branndennburg, inn Preussen, / zw Stettin, / Pommern, der Cassubenn unnd Wendenn hertzogk, burggraff zw Nurmbergk unnd furst zw Rugenn