Letter #998
Mauritius FERBER to Ioannes DANTISCUSHeilsberg (Lidzbark Warmiński), 1533-08-22
| received 1533-09-01 Manuscript sources:
Auxiliary sources:
Prints:
| ||||||||
Text & apparatus & commentaryPlain textText & commentaryText & apparatus
Reverendissimo in Christo patri et domino Ioanni Dei gratia episcopo Culmensi, fratri et amico carissimo et honorando
Reverendissime in Christo Pater et Domine, Domine Frater et Amice carissime ac plurimum honorande.
Litteras Reverendissimae Dominationis Vestrae datas XIII Augusti accepi. Ex quibus primum intellexi Dominationem Vestram Reverendissimam ita secum constituisse, quod velit a reverendissimo domino episcopo Plocensi recipere munus consecrationis, quod admodum me exhilaravit et nihil libentius audiri a me potuit. Et ut ista consecratio felix et fausta [sit] Reverendissimae Dominationi Vestrae, ex animo opto et precor. Neque ego detrectassem ... interesse et astitisse, si per Reverendissimam Dominationem Vestram vocatus ad ... essem et per valetudinem meam, quae frequenter adversa est, licuisset. De monetario negotio rettulit mihi dominus Achatius Zceme castellanus Gedanensis, cum nuper ex Konigsberg veniens huc ad me divertisset, quod illustrissimus dominus dux in Prussia etc. iam nobiscum in cessationem cussionis monetae consentiat et quidquid in proximo conventu de hac re utrimque conventum ac conclusum fuerit, servare et approbare velit.
In conventum proximum Deo et sanitate comite sum venturus, ubi de his ac aliis latius coram colloquemur. Interea Reverendissimam Dominationem Vestram felicitet, sospitet ac in bona valetudine conservet Christus Dominus noster.
Datae Heilsberg, 22 Augusti anno 1533.
Reverendissimae Dominationis Vestrae in omnibus bonus frater Mauritius episcopus Warmiensis subscripsit