Reverendissimo in Christo Patri et Domino, domino Ioanni Dei gratia episcopo Culmensi, fratri et amico carissimo ac plurimum honorando

Reverendissime in Christo Pater et Domine.

Salutem omnemque felicitatem et commendationem.

Venit nudiustertius huc nuntius Vestrae Reverendissimae Dominationis ad curiam regiam proficiscens, qui mihi amicas Dominationis Vestrae Reverendissimae reddidit litteras. Quod in eis recolit ea, quae reverendissimo Plocensi ad memoriam reduxi, placent cunctis , et quod hoc ipsum ego etiam nunc facerem, Vestra Reverendissima Dominatio me adhortatur, nihil enim haesito me hoc iam pridem fecisse Dominationem Vestram Reverendissimam ex litteris regiis, item et Plocensis praesulis, quarum exemplaria Dominationi Vestrae Reverendissimae communia fecimus, intellexisse, praeter quod de contributione nihil mentionis fecerimus. Nam eiusdem ferme omnem nobilitatem, cives et plebeos difficiles ad illam nunc praestandam sese reddunt ob inaequali<ta>tem, quae in novissima contributione servata est, scio etc. Audiemus id in futuro conventu.

Consului tunc sacrae maiestati regiae, ut ambobus cancellariis Regni, item episcopo Plocensi, qui tunc etiam in Lituania hoc officio prout nunc facit singulariter, ne eius maiestati illam nisi in universum exigerit. Si secus faciet, non solum modicam perciperet pecuniam, sed et non mediocrem etiam inter omnes Prutenos excitaret discordiam futuram et obluctationem alterum adversus alterum. Exauditus autem non fui, quo super habeo regia diplomata. De his coram extensius in mutuum colloquium cum Reverendissima Dominatione Vestra conferam et tutius.

Quam interea felicem et incolumem ad vota valere et vivere cupiens.

Ex Helsberg, X Aprilis 1536.

Eiusdem Reverendissimae Dominationis Vestrae totus Mauricius episcopus Warmiensis scripsit