» CORPUS of Ioannes Dantiscus' Texts & Correspondence
Copyright © Laboratory for Source Editing and Digital Humanities AL UW

All Rights Reserved. No part of this publication may be reproduced or transmitted in any form or by any means, electronic or mechanical, including photocopy, recording or any other information storage and retrieval system, without prior permission in writing from the publisher.

Letter #4475

Jan LATALSKI to Ioannes DANTISCUS
Cracow (Kraków), 1537-04-25
            received [1537]-05-07

Manuscript sources:
1fair copy in Latin, in secretary's hand, author's signature, AAWO, AB, D. 5, f. 15

Auxiliary sources:
1register in Polish, 20th-century, B. PAU-PAN, 8248 (TK 10), f. 442

 

Text & apparatus & commentaryPlain textText & commentaryText & apparatus

 

Reverendissimo in Christo patri et domino Ioanni Dei gratia episcopo Culmensi et coadiutori Varmiensi, domino amico tamquam fratri carissimo et honorando

Reverendissime in Christo pater et domine, amice tamquam frater carissime et honorande.

Redditae sunt nobis litterae Paternitatis Vestrae Reverendissimae, quibus nos visere et sanitatem nostram aeque suam nobis cupere dignata est, pro quo agimus et habemus Paternitati Reverendissimae Vestrae magnas gratias. Nos profecto vicissim et incolumitatem longam et omnes feliciores accessiones Paternitati Vestrae Reverendissimae precamur. Quod vero attinet istos exules episcopos, qui Gedani morantur, cum primum dabitur nobis occasio, ita ut prius scripseramus, faciemus pro eis quicquid poterimus libenter. Nova apud nos haec sunt: Valachus hodie scripsit maiestati regiae humiliter supplicans, ut cum eo amice et gratiose super istis differentiis componere dignaretur. Serenissimus rex Romanorum ipse magno affectu interce[dit] pro eo ad maiestatem regiam et petit, ut admittere ad se dignaretur venire tam suos oratores, quam etiam Valachi. Sua maiestas iam praefixit tempus pro festo Penthecostes vel paulo longius oratoribus ipsis ad se veniendi. Qu[id] posthac erit, scribemus Vestrae Paternitati Reverendissimae per aliquem occurrentem. Turci in Ungaria profligarunt nunc aliquot milia serenissimi regis Romanorum et multi desiderantur. Valachus timet et maiestatem regiam et Thurcum. Ideo petit gratiam, plus tamen fraude quam virtute utitur. Idcirco maiestas regia omnino decrevit cum omnibus suis subditis Russiam proficisci. Sunt et alia multa, sed propter nostras occupationes non potuimus nunc Vestrae Reverendissimae Paternitati significare, tamen postea nacto nuntio scribemus Vestrae Reverendissimae Paternitati omnia. Cui nos ex corde commendamus et valere feliciter cupimus. Praeterea venturi etiam sumus Pethrcoviam ad synodum pro festo Sanctae Trinitatis. Iterum cupimus Vestrae Reverendissimam Paternitatem feliciter valere.

Ex Cracovia, ipso die Sancti Marci anno Domini M-o D-o XXXVII.

Eiusdem Paternitatis Vestrae Reverendissimae totus Ioannes episcopus Cracoviensis subscripsit