Unsernn freuntlichenn grues mit aller seligheit wunschung zuvo[ran].

etc. Edler, ernfester her und freuntlicher, lieber gefatter. /

Wir schic[ken] euch hiemit Ewer Herlichkeit III pferde, die wir zu unser nottorfft aus nochlessiger vorgessenheit unss[er] diner / bisher mit uns gehabt, / und die fueglicher weis aus Braunsberg Ewer Herlichkeit hetten mugen widerumb zust[el]len, / bittende, uns solchs zu gutte wolde haltenn. / Derwegenn wir auch Ewer Herlichkeit in sondrem fleis danckenn / und im vilgrossernn gernn wollenn beschuldenn. / So unsere pferde, / die wi[r] noch gelossen, / etwan schadloss mitlerzceit were[n]n wordenn, / wolde die widerumb mit dissen dinernn unsermm housman gen Braunsberg lossen zu komenn. / Hie mit wir Ewer [Herlichkeit], der wir vor alle woltath uns bewisenn freuntlich dancke[nn], Gote dem almechtigenn mit unser libenn gefatterin und tauffpattenn, jungfer Cristinenn / und dem ganczen gesle[cht] in sein gotliche gnad und barmherczigheit befolenn.

Datum aus unsermm sloss Wormenit, den XXVII May MDXL.