Letter #2190
Mathias PLATEN to Ioannes DANTISCUSGdańsk (Danzig), 1539-07-12
| received 1539-07-22 Manuscript sources:
| ||||
Text & apparatus & commentaryPlain textText & commentaryText & apparatus
Dem hochwirdigsten in Gott furstenn unde hern, herren Ioanni, von Gotis genaden des loblichen stichts Ermelant bisschoff etc., meynem genedigen herm(!)
Hochwirdigster in Got Furste, Genediger Herre, / Ewer Furstlichen Genoden szeynth meyne gancz unvordrosszene stete dynste zcuvorann boreth unde bevholennn etc.
Genediger Herre.
Noch lowthe Ewer Furstlichen Genoden schreyben szo schicke ich Ewer Furstlichen Genoden ʝ stein pheffer / unde II huxhoveden weysze francze weyne / unde I feszleyn allekanth. Habe in nicht besszer konnen uberkomen off dyssze zceytt, / unde als was von ffrancze weyne komth, ist alles rother unde das beste nicht. /
Genediger Herre, nouge zceytungen wes ich beszunders nicht zcu schreyben Ewer Furstlichen Genoden, denn das wyr Danczker eynen abeszagten fynth haben. Her Michell von Szentczloff, szon ...n ...szenl...cz , / Geronimus Senczloff, unde eyn ehrwirdiger rat hott vorgeschrÿben vor dy stadtthore: / der in lebendick gefangen kan brengen, der szall hoben tawszenth jachen doler; / der in thott brenget, szall V schock daler haben; / unde der von szeynen geszellen kan oberkomen, szal haben en schock daler / unde szall vorszorget warden zcu szeynen tagen. /
Domytthe ich Ewer Furstlichen Genoden thu dem almechtigen Gothe bephelen myth eynem gluckszeligen regimente.
Datum Danczke, am 12 Iulii anno 1539.
Ewer Furstlichen Genoden getrower dyner Macz Platen
Genediger Herre.
Der ʝ steyn pheffer steth = VIII mark minus IIʝ g[roschen].
Item XXIIII stoff allekant, den stoff = XIIII schilling ist = Vʝ mark VI schilling.
Das gefesze = III groschen.
Item dy II huxhoveden francz weynnn, das stucken Vʝ gullen, ist = XVIʝ mark.
Item der weyn war wan / vor VIII stoff folle weyn von stoff V schilling gegeben, ist = XIII groschen I....
Dem wynschroder gegeben vor bede stucken = XX schilling.
Den knechten zcu byre = I groschen.
Summa is = XXXI mark ᶍI schilling groth.