APG, 300, D/ 5A, No. 925, p. [1]

Sigismundus Dei gratia rex Poloniae, magnus dux Lituaniae, Russiae Prussiaeque etc. dominus et heres

Famatis praeconsulibus et consulibus, iudici et scabinis civitatis nostrae Gdanensis, fidelibus nostris dilectis

Gratiam nostram regiam, famati fideles nostri dilecti.

Certo edocti sumus in civitate nostra Gdanensi hostium nostrorum sub ordine cruciferorum degentium multa bona tam mobilia, quam immobilia in debitis et aliis rebus haberi. Quae quoniam per hoc bellum, quod graviter lacessiti iuste suscepimus, ad nostram maiestatem spectant et legitime devoluta sunt, ne igitur incomposite distrahantur vel ab incolis Gdanensibus pro eorum usibus supprimantur, mittimus hunc nobilem Ioannem Dantiscum, secretarium nostrum, fidelem dilectum, ad Fraternitates Vestras. Quem de mente nostra informavimus, quid cum huiusmodi bonis nomine nostro agere debeat.

Volumus itaque, ut eidem secretario nostro fidem adhibeant, quicquid desuper vobiscum ex commissione nostra conferret et omnia haec bona tam mobilia, quam immobilia, per dictum nostrum secretarium Fraternitates Vestrae conscribi faciunt operasque vestras, quo talia bona facilius explorata habeat, impartiant. Quicumque vero vestrum et concivium vestrorum sine vel cum mandatis nostris in dicta hostium nostrorum bona et debita qualiacumque arrestationes fecerint, et quantum quisque et qua de re arrestaverint, eidem secretario nostro exponant et significent, unde certiores facti indemnitati omnium, prout aequitas postulabit, consulemus. Sic igitur et non aliter pro gratia nostra facturi.

Datum Thoroniae Sabbato ante Dominicam Domine ne longe, anno Domini millesimo quingentesimo vigesimo, regni vero nostri quarto decimo.

Ex commissione propria sacrae regiae maiestatis