Ioannes etc.

Unsere gnad zuvorann. / Ersame, libe, getrewe ....

Wie in vorwichnenn tagen durch unsernn burggroven euch befolenn, / das ir das gewa[nt] und anders Hans Hennemann, unsermm paurenn, zukomende bis uff unsernn weiternn befhel be... euch vorspert solt habenn, / so gebit wir euch, das ir solchs gewant, welchs der gestalt bey euch in uns... stat ist, in beywesen gedochts Hans Hennemann, dem wir geleit gegebnn, thut vorkowfenn, / und das gelt do vo[n] in acht wochen / zum leczsten termin hie her durch ewer geschicktenn sendet und los... brengenn. / Hiran geschicht unser ernstl... meynung, / der ir und nicht anders bey u[n]ser sverenn ungenad solt nochkomenn.

Datum aus unserm sloss Heilsberg, den XV Ianuarii MD X[L].

Ioannes

Den von Wormenit

Unsere etc. Ersame etc.

Wie wir euch negst habnn lossen wissenn, / das euch mit unsernn libnn, getrewenn, den ersamenn von Braunsberg ... tag vor uns / der klag zcedel halbnn, uns wider euch uberreicht, / woltnn ... hab wir in der negsten freitag noch Letare, / den XX dis [monts], hie her sich zugestellen / benumet, / den wir euch derglei... mit andern unsernn stetenn, / welche disse sache mit anghet, / h... seczen und legenn , der vonn Braunsberg klage anzuher ... daruff zu antwurtnn, / och ewer besverde, die ir vormeint, von in zu haben, mit ein zu furenn, / ... werdet ir ouch ewren mitverwantnn in disser sachenn den andren steten, / an ... den und euch mit in darnoch richtnn. / Welchs wir euch genediger ...nung nicht habnn wollnn vorhalten. /

Datum aus unserm schlosse Heilsberg, den IX Martii MD XLV.

Unser genad zuvorann. Ersame, liebe getreuenn.

Was ihr uns in sachenn die auftragung, / so von frawen Dorottea, seligenn Nickel Nitschen vorlassenen witwen, / ihrem tochterman Thewes Schachten wegen ihres alters und blinden gesichts / gischen, / durch ewer schreiben undertheniglich zuvorschen gegeben, / haben wir genugsam eingenomen. / Und die weil wir ...[d]ie sache am neheren mal zu gerichte gewesen, / von da sie [a]n uns appellirt worden, / und die ...art vor uns ersta...en seindte, haben wir aus eingelegter copia der vorschreibung, welche aus unserm bovel ins gerichtbuch eingefurth, vornomen, / wie wir uns auch des zum teil wol wissen zuernewnn, / das solchs anstragung dargestalt an uns bracht / und vorhandelt worden ist, / wissen wir den mit keinem fug widderzukomen, / sunderlich dieweil des unm[u]ndigen vormundt damals daran und daruber gewesen, / die auftragung angehort und nicht widdersprochenn, sunder darin bowilliget hat, / der unmundige auch nicht des vormugens gewesenn, / die vorstorbne belinde frawe, sein grosmutter, mit kost und anderer leiblicher notturft bass zu ihrem ende, / wie Thewes Schacht auf sich genomen, / aufzuhaltenn. Derwegenn lassen wir ess bei vorigem unserem erkentnus und darauf gethenem bovelich bleibenn, / das wir hiemit neben der vorschreibung , so dem gerichts buch hiruber ein pleibt, / bocreftigenn. Nichts wenigers, / dieweil das appellirende teil sich boclagt, / als solte ess durch solche auftragung loglich boswert sein, / den die vorstorbne fraw nicht so arm gewesen, / wie man sie bei uns angegebenn, / und das der unmundige auch ein armer knabe sei, / behalten wir uns noch vor, / wen wir, / wils Got, gesunth bei euch werden ankommen, / die sache allenthalbenn bass zuundersuchen , / damit keinem teil an seiner gerechtickeit vorkurtzung gesche, das ihr ihnen also aus unserm bovel werdet anzeigen und vorlesen, / damit sie sich darnoch zuhalten haben. Und geschicht hiran von euch unsere gefellige meinung.

Datum aus unserm schloss Heilsberg, XXV Augusti M D XLVII.