Reverendissimo in Christo Patri et Domino, domino Ioanni Dei gratia episcopo Culmensi etc., domino et fautori perpetuo observandissimo

Post humilem et perpetuam servitiorum meorum commendationem.

Reverendissime Domine, domine et fautor mihi colendissime.

Variae occupationes tum etiam cura domestica non permisit tanto tempore Vestram Reverendissimam Dominationem nec personaliter, nec litteris invisere. Rogo vehementer, non aegre ferat Reverendissima Dominatio Vestra et boni consulere dignetur, hinc more gratiaque sua me servitorem suum amplecti non desinat, qui assidue cogito, ut Reverendissimae Dominationi Vestrae in omnibus morem geram.

Nova nulla habeo, quae Reverendissimae Dominationi Vestrae significare deberem. Hoc tantum, quod fortassis Reverendissimam Dominationem Vestram non latet, cur cessit episcopatus Cracoviensis Vestrae Dominationis Reverendissimae boni amici et mei benefactoris reverendissimo domino Poznaniensi. De Poznaniensi hactenus nihil certi habemus. Varii varia referunt et certo affirmant reverendissimum dominum Vilnensem ad eum esse promotum. Noster tamen dominus Premisliensis bene sperat de Plocensi et exspectat suos servitores nondum expeditos et nuntium regium cum bona novitate. Deus huic concedat, qui rei publicae primum, tum Deo sit idoneus, et nobis gratus atque gratiosus.

Domini Litwani iam procedun[t] contra Moscos, qui magno et valido exercitu Litw[a]niam ingredi nituntur. Sacrae maiestates optime sanae [sunt] et parant iter versus Poloniam circa mediu[m] Quadragesimae. Sed non possum facile adduc[i], ut credam. Quid tandem sequetur, videbimu[s].

Militia Regni constanter in numero constituto p[er]severat, ut expeditio fiat, in quantum ea opus sit. Sed ego non probo istam constantiam, quamvis(!) video opus esse magna emendatione in multis rebus.

Alia nulla habeo et ea, quae scribo, ita ex aliis didici. An sint certa et vera, non affirmo.

Et cum his bonae gratiae me et obsequia semper indef <es> sa Reverendissimae Dominationi Vestrae commendo longamque sanitatem et omnia felicia ex corde Reverendissimae Dominationi Vestrae precor.

Ex Gorsno, die sancti Valentini anno Domini 153[6].

Reverendissimae Dominationis Vestrae deditissimus servitor Nicolaus de Nisczicze castellanus Sieprcensis manu su[a]