Dem durchlauchten, hochgebornen fursten un[d] hern, hern Albrechtenn, von Gots gnaden marggraff zu Brandenburg, in Preussen, zu Stetin, Pomernn, de[r] Cassuben und Wenden hertzog, / burggraff zu Nurberg und furst zu Rugen, / unsermm vil..., gunstigen, lyben hern und freun[d]

Durchlauchter, hochgeborner furst, / vÿlgunstiger, lyber herr und freundt. / Unsere freuntliche, wÿllige dinst zuvoran. /

Wir haben gestriges thages Ewer Furstlichen Durchlaucht schreÿben beÿ unsern bothenn entpfangen, / doruff wir Ewer Furstlichen Durchlaucht zu wÿlferigem antwurt / nicht wollen vorhalthennn, / dass wir dÿse thage uns mit den unssern wollen entslyssen, / wass beÿ des thames schutten beÿ Bÿschburg besÿchtungen zu thun / und dan mit den ersten Ewer Durchlaucht lassen wÿssen, / wÿ do dÿ zu samne kommung monthags noch mitfasten sol geschen / und uns, / so vÿl ummer muglich, / so solches thams schuttung ane unserr und der unsern schaden mag geschen, / gefellig und wÿlferig gen Ewer Furstliche Durchlaucht beweÿssenn, / der wir uns in allem, / das in unsern vormugen ÿst, / gern woltenn vor[ha]lthennn. / Bÿtten auch, das sicherlich von [un]s zu glawben etc.

Dyweÿl w... gewÿss bericht, dass dÿ sache ... Ewer Furstlichen Durchlaucht underthanenn Matisen von [Eldit]ten / und des entleybten freuntsch...sentzlich seÿ beygelegt und vortragen, / und wir / zuvor vor gedachten Matisen geschrÿben, / ist noch unser gantz freuntlich und vleÿssig bÿtt, Ewer Furstliche Durchlaucht wolde im genediglich vortzeÿchenn / das jennige, das er in dem fhal wÿder Ewer Furstliche Durchlaucht oberkeÿtt mishandelt und gebrochen / und wÿderumb sein genediger her sein, / domit er mocht in seynnen guthernn under Ewer Furstliche Durchlaucht sein thage in Gots und Ewer Furstliche Durchlaucht gnade zu bringen. / Wÿ wir uns dan vortrawlich zu Ewer Furstliche Durchlaucht vorsehennn, / werd dyse unser vorbytt und schrifft freuntlich und ersprislich von uns annhemenn und geleÿsten, / das wir widerumb Ewer Furstliche Durchlaucht, der wir sein vÿl wÿlferigerr, freuntlicherr dinst zu thun wÿllig, / mit hohen vleÿs gernne wollen beschulden. /

Datumm Heÿlsbergk, den IIII Marcii M D XXXVIIIten.

Ioannes, von Gots gnaden co[lmisc]her byschoff, administrator zu Pomesan und [postulirt] zu Ermelandt