Durchlauchter, hochgeborner furst, hochgunstiger, lieber herr und freundt. / Unser freuntliche und vleis willige dinste zuvoran. /

Ewer Furstlichen Durchlaucht gantz freuntlich und gunstig antwort uff unser negst schreiben / haben wir gestriges tages / bei diesem lauffenden bothen / uberkommen, / doraus uns guter bericht ist worden, / den wir mit grosser danckbarkeit angenommen, / auch nicht weniger dancken, / das Ewer Furstliche Durchlaucht in der sachen unsers burggraffen bruder, / des erbarn Matts von Elditten, / von wegen des testaments / sich gnediglich erbotten / und uns mit der zeit / die gelegenheit desselbten / wil wissen lassen. /

Wir hetten negst geschrieben / bittendt von Ewer Furstlichen Durchlaucht belernt werden, / dieweil tewrung zuvorhueten, / das ausschiffen getreidts Ewer Furstliche Durchlaucht bei den iren hat vorbotten, / und uns auch den unsern solch vorbott zuthun / eingefurt, / wie lange und bis an welche zeit / es solte gehaltenn werden. / Die unsern clagen sich beschwert, / das den von Dantzke frey ist, / das ire zuvorfuren, / gewinst und nutz nach irem willen zusuchen, / in aber hirinne ire narung zusuchen nicht zugelassen. / Bitten derhalben, wie wir uns in diesen geschefften / den unsern sollen erzeigen, / Ewer Furstliche Durchlaucht uns wolde zuvorstehenn gebenn. / Was sonst uf Ewer Furstlichen Durchlaucht cantzleÿ und eigen handt schreiben / zuwissen von notten, / hab wir ins kurtze, / domit Ewer Furstliche Durchlaucht durch vil lesen, / ader horen lesen, / nicht werde beschwert, / aus unser ungeschickten feder / an Ewer Furstliche Durchlaucht, der gunst und zugeneigter freuntschafft wir uns befelhen, / lassenn gelangen. /

Datum Heylsberg, den andern tag Maÿ / M D XL.

Joannes, von Gots gnadenn bischoff zu Ermelanndt manu propria subscripsit