Hern Zceme etc.

Unsernn etc.

Uns ist negst Ewer Herlichkeit schreibnn datum dingstag vor unser libnn frawenn entfangung / und das ander gestrigs tags geworden, datirt den domerstag vormm palmtage, / darann wir sondernn gefallnn gehabt und nicht wenig erfrewt. / Bedancken uns des freuntlichen fleisses, / erbottig zu beschulden. / Wir habnn ouch mittler zceit von hern Sigmund von Herberstein brive gehabt, / die sich fast mit Ewer Herlichkeit schreibenn vergleichnn, / Got dem almechtigen sey lob, ehre und danckt, / das boser leut zceitungen / nichtig sein wordenn. / Zur Gutstat ist einer durchgerittnn, / der gesagt hot, / das der her Odrowonsch und konigliche majestet mit tode wernn abgangen. / Des nhamenn zuerforschen und wer er sey / hab wir nochgestelt etc. Uns wirt geschribnn, das hochgemelte konigliche majestet / demm alter noch sey in gutter gesuntheit. / Der mostrung halbenn hab wir dem grosmechtigen hern marienbergschnn woywoden geschribnn. / Die ist vorlegt biss uff den XV Septembris, / wie Ewer Herlichkeit aus dem brive, / den sie brechnn mag, / wirt zu vornemenn habnn. / Was das spital und habenn, / ouch anders angeth, / wil disser heiligester freitag / vil da vonn zu schreibnn die zceit nicht gebnn. Welchs wir alles uff unser negste zusamme komenn, / das uns Got in gesuntheit vorlege, / des gnaden wir ouch Ewer Herlichkeit befelnn, / vorhalten.

Datum aus unserm schlosse Heilsberg, III Aprilis MD XLV .