Scheda in litteras palatini Marienburgensis

Wie dies unser schreibenn an Ewer Herlichkeit allenthalben ist fertig gewesenn, / hat man uns dersulben shones, / her Christof, brief, / aus Ewer Herlichkeit bovel an uns gestellet, / geantwurt, / darin uns die geluckselige wolfarth mit einem langen und gesundenn lebenn von Got dem almechtigenn wunschet, / welchs der gestalt und mit solcher dancksagung von uns ist angenomen wordenn, / das wir Ewer Herlichkeit herwidder dergleichenn von Got dem almechtigen hertzlich wunschen und bittenn. Wir shen auch, was uns vorhanden und allegereith vor der thur ist, / haben uns noch viel eins grosseren, / das sich vieleichte aus dieser unrichtickeit heben mag, / zubefurchten, / derwegenn uns den gutter rath, / wie dem allen muge vorkomen werdenn, / sehr von noten ist, / des wir vorwar wenig in unserenn geringen verstande bofindenn. / Wir haltens davor, das wir diese straffe, / die noch uber uns henget, / lengest verdint habenn. / Mussenn derhalbenn dis thundt gotlichem willen bovelenn, / und mit unserm empfigen und fleisigem gebet anhalten, / damit ess durch den gewandelt werde. / Menschen rath ist zu diesenn sachenn viel czu wenig etc.