Reverendissimo in Christo Patri et Domino, domino Ioanni, Dei gratia episcopo Warmiensi etc., domino suo gratioso et plurimum colendo observandoque

Reverendissime in Christo Pater et Domine, domine gratiose, plurimum colende observandeque.

Post officiorum diligentem commendationem Reverendissimae Dominationi Vestrae omnem precor felicitatem.

Offerente sic se occasione, quod praesentium lator Georgius Jancowski a Sebastiano fratre illuc vocaretur, in eam animatus spem, quod inter servitores Reverendissimae Dominationis Vestrae haberetur, nolui illius deesse petitioni, sed eo proficiscentem animo cum confirmare magis, tum commendatiorem etiam reddere. Namque a puero annis continuis fovi septem cum domi, tum foris, ut tam mores, quam linguas disceret utrumque, dum sub meo esset imperio, dextre satis nec infeliciter assecutus, nisi (quod iuventus habet) feroculus alicubi sibi excidit. Migravit deinde videre Italiam, eam quoque discere linguam. Huc rediens fortunam exspectavit. Hanc, cum reperit, ut retineret, admonui, quod, spero, faciet. Hoc de illo dare possum testimonium, quod diligenter fidelem semper, mandacem numquam, animo forti audacique ubique reperi, speroque sic se geret, ne ego errasse videar, nisi ille aer potusque mutaret animum. Quod ne fiat, Reverendissima Dominatio Vestra nullum illi otium concedens avertere potest, habitura recte institutum ad omnem paratum sellam.

Mitto per illum zonas quasdam sive cingulos illustrissimae dominae, dominae ducissae coemptos. Rogo, Reverendissima Dominatio Vestra per certum se offerentem sibi cum litteris meis mittere dignetur.

Sit felix, diu recte valeat meque sua prosequatur gratia Reverendissima Dominatio Vestra.

Datae Cracoviae, 13 Maii 1539.

Reverendissimae Dominationi Vestrae deditus servitor Iostus Ludovicus Decius scripsit