Reverendissimo in Christo Patri et Domino, domino Ioanni Dei gratia episcopo Varmiensi, domino et maiori plurimum observando

Reverendissime in Christo Pater et Domine, domine et maior plurimum observande. Obsequiorum meorum studia et commendationem.

Scripsi, ut Reverendissima Dominatio Vestra monebat, ad sacras regiam et reginalem maiestates, item ad reverendum dominum Samuelem Matzieyowski, quas litteras, rogo, Reverendissima Dominatio Vestra velit suo nuntio, vel si is iam dimissus est, domino Fabiano de Damerau Cracoviam perferendas dare. Exemplum litterarum ad regiam maiestatem ideo misi, ut Reverendissima Dominatio Vestra videat, quid de mei expilatione et expeditionis exorbitantia questus sim, si forte Reverendissimae Dominationi Vestrae libebit pro se quoque conqueri et calcar addere meis postulationibus, certe incumbere omnes deberent in tantam ingluviem exstirpandam. Domino Kyewski depinxi hominem, quem mihi obtrusit, ipse sui erit spectator, quem videbit mihi quoque iam notiorem factum. Reverendissima Dominatio Vestra omni ex parte cumulat in me suam beneficentiam, nec patitur me Eleazarum fieri, nisi suis pontificalibus ornatum, pro qua in me paterna pietate habeo gratiam plurimam. Mitto itaque quas Reverendissima Dominatio Vestra postulavit mensuras, quarum bacillus longitudinem indicat pedis et sandaliorum, filum vero rocheti, quod medias suras tangere solet. Commendo me Reverendissimae Dominationi Vestrae, quam Deus servet felicem et incolumem.

Lubaviae, die III Augusti 1538.

Eiusdem Reverendissimae Dominationis Vestrae obsequentissimus Tidemannus electus Culmensis