Unsernn freuntlichnn grues zuvorann. / Ersamer, gutter freundt. /

Wir habenn euch den somer negst vergangen wie ummb alles geschribnn . / Bitten bey dem geslecht das beste zuthun etc. Wie wir ouch huffen, / so gesche, / ist noch unser bitt mit der underhaltung die mutter zuvorsorgen alle jor XXV ducaten / und die tochter gen Antorff an Francz Werner zu schicken, / die pension nu im Marcio anzuhebenn uff ein jor XXV ducaten, wollnn wir mit danckparheit ouch interesse, das daruff gelegt mag werden, / do nebenn ouch was uff die tochter ghen wirt uberzuschickenn, / hern Bartolme Welser zu Auspurg dar legenn und volkomlich beczalenn, / derhalbnn wir ouch unsermm guttmm freunde señor Hieronimo Seler geschribnn, / der bey dissem unsermm beger das beste wirt thun. / Ouch her Cornelius Scepperus. / Bittenn derhalbnn wie zuvor, / wolt hirinne thun, wie wir euch vertrawenn. / Beschulde wir ummb euch alzeit gernn. Wolt ouch mutter und tochter von unsernn wegenn grussen. / Hiemit Gote dem almechtigen befholenn. /

Datum uff unsermm slosse Lobau, XI Ianuarii 1534.