Dem durchlauchten, hochgebornen furstenn und herrn, herrn Albrechten, marggraff zu Brandenburgk etc. und hertzog in [Prewssen], etc. unserm hoch... genedigen hern und freundt

Durchlauchterr, hochgebornerr furst, hochgelybtherr herrr und freundt / und genedyger her. Unser freuntliche, wyllige dinst zuvoran. /

Uns sein dyse thage / von dem hochwirdigsten, / unsermm lyben hernn und freundt / byschoffen von Ermelandt koniglicher maiestet, unsers allergnedigsten hernn, brive von wegen des contractss mit konniglicherr erweltherr wirdt / von Dennemarcken botschafftter / vorfast zcw komenn. / Und so wir dyssmalh von hochgedachter koniglicher maiestet, unserm allergnedigsten hern, / zw andren wichtigen geschefftenn gen Dantzig uns zw begeben ihm wege / sein, / hab wir dem edlen, gestrengenn hernn Achacio Cheme, dantzker castellann und hawptman zum Stume, / dy selbige bryve mit allem befhelh zw geschickt, / domit her mit dem erstennn / mit gedachten hern botschaffterr / zceit und mass benueme, / gen Marienburg zu komenn und konigliche maiestet, unseren allergnedigsten hernn, / befelhe und wyllenn nachstellende zcum ende, / wy vorlassen, vorhandle, / das wir so freuntlicherr, dinstlicherr meÿnung Ewer Furstliche Gnaden, der gesunde und gluckselige ankunfft / wÿ hertzlich gerne vornomenn und uns der selben gunst thun befelhenn, nicht haben wol[lt] vorhalthen. /

Datum uff koniglichem schlose Meue, den XVII April M D XXXVten.