Dem Hochwirdigsten in Goth Furs[te] unde Herren, herren Ioanni von G[ots] genaden / des loblichen stichts Ermelanth bisschove etc. unsern genedigen herre[n] .

Hochwirdigster in Goth Furst, Genediger Herre.

Unser bereitwillige / und unvordrossene dinste seint Ewer Hochwirdige Gnaden stetz bevoran entpholen.

Genediger Herre.

Es hot uns der vorsichtige Hans Kamyn unser burger, zceiger dises / angeczeiget, wie ihme der ersame Jacob Foss Ewer Hochwirdige Gnaden zcu Wormnith underthan etzliche schult phlege sein sall, / welche er bisanher / nicht zcu geringes seinem schaden entporen uns / mit fleise bittende ihnen derwegen an Ewer Hochwirdige Gnade dinstlichen zcu vorschreiben und wie wol wir guth wissen tragen, das Ewer Hochwirdige Gnade ane unser vorbitt eynem idern dortzu er fugk / unde recht haben moge zcu vorhelffen in genaden gewogen.

So haben wir ihme / dennoch dise unser furderschrift / mit billickeit nicht wissen zcu vorleggen und ist derhalben / an Ewer Hochwirdige Gnade unser gantz dinstlich bitten wolle sich des guttes mannes sache in genaden bevolen sein lossen und oberdochten Jacob Fos dohin / weÿsen und richten lossen, das er gemelten Hans Kamyn clagelos mache und benugliche zcalunge thu. Sulchs seint wyr ummbe Ewer Hochwirdige Gnade in aller dinstlicher wilfaerunge / unsers hogsten vormogens zcu vorschulden bereidtwillig mit hulffe des Almechtigen.

Deme wier Ewer Hochwirdige Gena[de] zcu langen tagen / gesunt und seliglich mit fleis entphelen.

Geben Dantczigk, montages zcu Phingsten etc. anno etc. XLI.

Ewer Hochwirdige Gnaden dinstwillige burgermeister und rathm[ane] der stadt Dantzigk