Dem Hoch[wirdige]nn in Gott Herrn, herrnn Johan vo[n] [Go]ti[s] [ge]naden bisschoffe zcu Ermelandt etc., un[n]serm gnedigen herren[n]

Hochwirdigster in Gott Genediger Herre. /

Unser guthwÿllige dienste seint Ewer Hochwirdigen Gnaden zcuvoran mit fleisz entpholenn. /

Genediger Herre. /

Ewer Hochwirdigen Gnaden brieff den VII Iunii auff Heylszbergk gegebenn / haben wir disses thages in sittzendem radte vorsamlet entfangen und seÿnes fornern inhalt vornommem / unnd fugen Ewer Hochwirdigen Gnaden hirauff dinstlichen zcuwÿssen, / das wir Ewer Hochwirdigen Gnaden bedencken nach / unser briefe, so als dieselbigen copei weÿse an Ewer Gnade gestalt / in glawbwirdige form zcubrengen / und Ewer Hochwirdigen Gnaden ferner an konigliche maiestat zcustellen / zcuzcuschicken bedocht seÿnn. /

Wollen auch weiter an die andern stedte anregung zcuthuen (dasselbige gleichmessigk vortzunemen) nicht nachlossen. / Domitte demselbigenn also aus gemeÿnem bedenckenn eintrechtigklichen nochgekommen werden, moge / zcweyfelenn / auch nicht / die herrn woywoden unnd castellane werden gleichmessigk auch thuen / unnd die gemeÿne sache also furnemen. / Domit in sunderheitt nÿmandt mit irkeiner suspition beladen / ader sich bey koniglichem hofe vordechtigk ader sunst argkwenigk machen moge. /

Ewer Hochwirdigen Gnade zcu dienen und besundern wÿlferigenn wÿllenn zcubeweÿsenn (dem Almechtÿgenn Ewer Hochwirdige Gnade gesundt befholenn) thue wir allerzeit gerne. /

Datum Dantzigk, denn 9 Iunii anno etc. 39.

Ewer Hochwirdigen Gnaden guthwÿllige burgermeister und radtman der stadtt Danntzigk