Hochwirdigster in Goth Furst, Genediger Herre. /

Unser boreidtwillige und unvordrossene dinste / seint Ewer Furstlichen Gnaden zcuvorn entpholen. /

Genediger Herre. /

Szo und dweil / die jungst und schirstankommende tagefart, / so auf Michaelis itczt kunftigk hier im lande / phleget zu halten werden / sich nahet / und wir nicht eigentlich wissen, / ab diselbige zu halten / aus der straffe, so Goth der Almechtige / ummb unser missetaet / uber uns / ergehen leth / nochbleiben werde. / Hab wir nicht nochlossen mogen / sulchs / bey Ewer Hochwirdigsten Genaden / dinstlicher wolmehnunge / zu erkunden / und ist derwegen an Ewer Hochwirdigsten Gnaden unser gantz dinstlich bitten / wolle / geruchen / uns / durch kegenwertigen zceiger / mit seinen genedigen schrifften / vorstendigen ab dieselbtige tagfart / auf Michaelis schirstkunftig gehalten / und seinen vortgang haben / ader zcur anderer zceit / vorleget werde. / Domit wir uns / noch aller gelehenheit / mit den unsern / die wir hiertzu gebrauchen solten. /

Weiter dornoch hetten zu richten, / sulchs in aller dinstlicher wilfaerunge, / seint wir / ummb Ewer Hochwirdigste Genade (die wir Gote in langwerigen gesuntheit und gelugselig etc. wolfart / entphelen) zu vorschulden geflissen. /

Datum Dantzigk, / am / XIII Septembris anno etc. XXXVIII.

Ewer Hochwirdigste Gnaden dinstwillige burgermeister und rathman der stadt Dantczigk