AAWO, AB, D.94, f. 12v

Dem Hochwirdigen in Got Hern, hern Ioanni von Gots gnaden des stichts Colmen bisschove, / administrator des bischthumes Pomesan / etc., unserm gnedig(en) hern

AAWO, AB, D.94, f. 12r

Hochwirdiger in Goth, / Genediger Herre. /

Unszer guthwillige und behegliche dienste / szeint Ewer / G(nade)n / stecz czuvorn entpholen. /

Wyr wisszen, Gnediger Herre, E(wer) G(nade)n / vormuge unszer czugethonen gemuthe / nicht czubergen, / wie wyr in dato czu gutter notturft bericht erhalten, / das der eddele unnd erentfeste ko(nigliche)r ma(ieste)t unszers allergnedigst(en) hern hofegesinde / er Nicles Nyptzick hier ine lande, nemlich czur Frawenburck sich enthalte. /

Ouch myt eczlichen ko(nigliche)n gewerben / an ko(niglich)e dieszer lande Prewsszen rethe lande und stete / auf neigstankommenden lanttagk czutragen / belastet szein sal / der innehalt uns noch czur czeit vorburgen. Wyr werden aber under andern vorstendiget, das die szach und meynunge, / nemlich die bewuste vorordenunge der beyd(en) bischthumer als Heilszberg und Comlen / iren langst von uns begeert(en) vortganck, so als das von Gote / und ko(nigliche)r ma(ieste)t gnediglich vorszeh(e)n (des wyr allenthalben erfewet) gewynnet / und dweyl nhu / deme noch E(wer) G(nad)e, / also in den bischoflichen stuell vonn Ermelandt (Gote lob) vortrucken wirt. /

Szo thue wyr derszelbigen E(wer) G(nade)n / solcher glucklichen erhohung ires standes unnd stelle / hochlich congratulieren / unnd uns derwegen myt E(wer) G(nade)n / und alle den ihren herczlich frewen von Gote weiter gluck, / heylszelickeit und alle guth wunschende. / Myt angehefter erbiethunge / E(wer) G(nade)n / myth unszern fleissigen wilferigen diensten stecz czubehangen.

Hieneben ist an E(wer) G(nad)e / unszer dienstlich synnen unnd bytt, / who die artickel der gedochten ko(nigliche)n legation, / so durch wolgemelt(en) her Nypczick auf schyerstkommender tagefart geworben werd(en) sollen albereidt an E(wer) G(nad)e / (als villeichte szein moge) gelanget weren, wolle als denne geruchen uns dieszelbig(en) bey czeiger dieszes vortrarelich myteczuteilen. /

Domyte wyr uns dorinne notturftiglich erszeh(e)n / und also noch vorgengigen gehaltenen rathschleg(en) die unszern myt deste gegrunten und entschlosszenen befehlen abfertigen muchtenn. Das wollen wyr um(m)b E(wer) G(nad)e / im grosszern fal gerne vordienen / myt der hulffe Gots, deme wyr E(wer) G(nad)e / lange gesundt und seliglich thuen entphelen.

Dat(um) Danczick, am obende Sancti Matthei Apostoli anno etc. XXXVII.

Ewer G(nade)n gutwillige burgermeister und rathmanne der stadt Danczick