Reverendissimo in Christo pa[tri] ac principi, illustrissimo atqu[e] ... domino, domino Iohanni Dei gratia e[pi]scopo Varmiensi, multis no[minibus] praeclarissimo

Maximi fiunt apud me, Pater in Christo Reverendissime simul ac Princeps Illustrissime, qui mediocri nati loco propria virtute sunt rerum dignitatisque fastigium assecuti. Qui enim a natalibus usque rerum principes existunt, hos mirum non est eum tenere posse, ut qui natura contigerit, ordinem. Eosque decebat et litterarum omnium et philosophiae cognitionem habere, si vellent, ut ille inquit, esse, quod audiunt. Cum namque aliter iis habent res, quid aliud, quam ut Galenus ait: „Oves sunt aureae a Musis nimirum et Gratiis alieni ac miseri homines”? Quorum utinam minor esset per Germaniam numerus.

Tuam igitur, princeps, illustrem eandemque reverendissimam gratiam tum doctrina et rerum usu eximiam quamquam innumera summorum in Christiana republica heroum, papae, imperatoris regumque monumenta tuo merito parta non mediocriter exornant, propria tamen, reverendissime praesul, virtus tua humanitasque, id est, litterarum in te amplitudo ( quantum illum tibi splendorem accersivit) summopere videtur commendare. Quae me, Praesul Illustrissime, res movet, ut gratiae tuae, nisi recuset, duos cupiam Galeni principis medici libellos, Latinitate utcumque donatos, dedicare, rogoque hanc ob rem [clemen]tia tua me ea de re certiorem reddat ac sibi persu[a]deat nihil mihi esse gratius, quam tanto princip[i] tantisque, ut praedicatur, dotibus ornato placere.

Valeat in Christo bonorum omnium largitore Paternitas Tua, q[uam] et conatus ei omnes perpetuo in se amore fortunet.

Ante diem septimam Kalendas Septembreis, Elbinga.

Reverendissimae atque illustrissimae Vestrae Dominationis officiosissimus cultor Christophorus Heyl... medicinae doctor, Elbingen[sis] physicus

Eximio Viro, domino Christofero Heylo, medicinae doctori et phisico Elbingensi in Christo nobis dilecto

...leri... ...nter ...lere, unde te p[e]llectum e... ... [lu]cubrationes [no]bis, qui nihil eiusmodi [a] te meruimus, nuncupare sta... ... te nolumus opera Galeni qu... ... ...dito viro non pridem versa a nobis haberi omnia ... et tuam in nos ea in re propensionem ... ornamento et usui umquam esse possumus, omni nostra ... benevolentia rependemus.

Bene vale.

Ex arce nostra Heilsberg, ultima Augusti MDXXXIX.

Ioannes etc.

Salutem.

. Non fuit nobis molestum ad Elbingenses ratione residui salarii, quod Tuae Humanitati apud eos restare praetendis, scribere. Quas litteras sigillatas et his adiunctas Tuae Humanitati transmittimus et vellemus, ut multum illis, quod futurum speramus, apud eosdem obtineret. Apposuimus praeterea etiam nostris litteris duo epigrammata, quae hic inter alias schedas ad nos missas reperta sunt. Si quid simile habuerit, nobis Tua Humanitas communicet, et quandocumque agnoverit illi nostram operam necessariam esse, ea libere utatur.

Bene valeat Tua Humanitas.

Datae 7 Martii XLVII-o.