Dem erwirdigen in Gott unnserm besonndern, lieben freunth, herren Johansenn bischoffen zu Colmensehe

Erwirdiger in Got fiel geliebter Freunt und freuntlicher lieber her nachpar.

Ewer Lieb einigen hantschrifft mir pey meinem knaben zugeschickt hab ich aus solicher genugensamb versanden. Dy ursach, warumb Ewer Lieb mit irem swager, dem hern doctor nit einig, auch Ewer Lieb cristlich und fiel freuntlichs erpiten, des ich mich den kegen Ewer Lieb sunderlich freuntlich thu bedancken pin derhalben gesint in kurtz durch eigen potschafft weiter, domit einigkeit soviel mer bostendig gemacht, zuschicken und wes sich Ewer Lieb verner mir zu freuntlichen gefallen erzeigen werden freuntlich hinnwiderumb zuferdinen. Hab auch Ewer Lieb briff an den hern doctor geschickt und wer gantz wol gewegen gewest Ewer Lieb hohem und cristlichen erindern gestanden kegen Fasolt zuerzeigen wy mein erindern kegen Ewer Lieb gestanden.

Mir ist aber von hertzen leit, das mir er kein ursach gewen wil werden und domit ich zumb uberflus gespurt, das ich auch mer thun thet, wen mir von rechts wegen zugepuret, hab ich auch kegen Fasolt niet unterschidlichen condicionen erpoten 3000 vlorin zugewen, welchs Fasolt alles abgeschlagen wy ich nit zweifel Ewer Lieb von irem diner wy und was allenthalben gehandelt gennugsamb vernemen werden. Pit herumb Ewer Lieb, wo es anderst den wy gehandelt und gemeint an Ewer Lieb getragen wurde, Ewer Lieb wol solhen keynen peyfal ichnn sich auch kegen mir nit verhetzen lassen, das wil ich umb Ewer Lieb freuntlich beschulden, vergleichen und verdinen.

Befele Ewer Lieb Cristo und mich in ier andechtige gepete. Mein gemahel enttpeut Ewer Lieb fiel zimlicher dinst etc.

Datis in eile, Kunigspurgk, den 2 Augusti anno 1533.

Albrecht marggraff und hertzog etc.