Reverendo in Christo patri, domino Ioanni episcopo Culmensi sincere nobis dilecto

Sigismundus Dei gratia rex Poloniae, magnus dux Litwaniae, Russiae, Prussiae, Masoviae etc. dominus et heres

Reverende in Christo pater sincere nobis dilecte.

Molesto animo ferentes eam temeritatem et linguae petulantiam, qua insectatam se scribit Vestra Paternitas per capitaneum et cives nostros Graudentinenses nolentesque illam impunitam praetermittere, commisimus consiliariis nostris terrarum istarum, ut in proxima conventione istic celebranda cognitioni illius intendant in praefatosque capitaneum et cives Graudentinenses pro modo et exigentia huius tanti excessus illorum, qui revera nobis cordi est, mulctam convenientem decernant et constituant. Qua in re mandavimus dari et mitti cum praesentibus litteras necessarias Vestrae Paternitati, quae bene valeat.

Datum Cracoviae, feria secunda post Dominicam Misericordia anno Domini millesimo quingentesimo trigesimo tertio, regni vero nostri anno vigesimo septimo.

Commissio propria regiae maiestatis