Reverendissimo in Christo Patri et Domino, domino Iohanni Dantisc[o], [episc]opo Chulmensi, [serenissimarum] maiestatum Polo[niae] [o]ratori dignissimo etc. domino et fratri plurimum honorando

Apud sacram caesaream et catholicam maiestatem

Reverendissime in Christo Pater et Domine, mi domine et frater plurimum observande.

Solita commendatione praemissa.

Iam tandem supervenit serenissimae maiestatis reginalis mandatum thesaurario Barensi, ut sescentos ducatos in auro Velserorum factori Iohanni Viola nomine persolvat. Ego itidem mandavi illi, ut eandem summam absque ulteriori mora numeret. Annuit et obtemperare paratum se obtulit. Intra paucos dies pecunia persolvetur et tam longae comoediae extrema manus imponetur. Nec desinam quoad negotium suum sortiatur effectum, pro quo Vestra Reverendissima Dominatio in utramque iam dormiat aurem.

Nova hic nulla occurrunt scriptu digna. Negotia status Barensis cedunt, ut minus incommode possunt, quoniam, ut volumus, non possunt. Rerum omnium maxima fit iactura absente prorege, ad quem in necessitatibus confugiendum esset. Speratur tamen, ut auditur, quod brevi sacra caesarea et catholica maiestas in regnum proregem mittat, qui cuncta iuste et severiter tractet, quod Deus ipse faxit. Commendo Dominationi Vestrae Reverendissimae negotium domini Sigismundi de Russis, de quo ipse seriosius scribit. Id si successerit, et ipse et ego plurimum debere fatebimur eidem Vestrae Reverendissimae Dominationi, quae diutissime et feliciter valeat.

Datae Bari, die XVII Iulii 1531.

Eiusdem Vestrae Reverendissimae Dominationis ad vota paratissimus Ludovicus Aliphius etc.