Dem Erwirdigenn in Got, unserm besondernn Liebenn Freundt und Nachparnn, herrenn Johansenn bieschoffen zu Ermelandt etc.

Unnser freuntlich dinst zuvor.

Erwirdiger inn Got, besunder Lieber Freundt unnd Nachpar. /

Wir habenn dem erbarnn unnserm secretarienn, rath unnd liebenn getreuenn, Erhardenn Heckelmann, etliche bevelich, / darann unns, / auch unnsernn landenn unnd leutenn nicht wenigk gelegenn Euer Lieb vonn unnsernt wegenn zuvormeldenn, / wie dann dieselb ferner vonn ime vornemenn werdenn aufferlegt unnd abgefertigt. / Demnach ist ann Euer Lieb unnser freuntlich bit dieselb wollenn obgenantenn unnserem secretario uff dismal, / solchem seinem ufferlegtenn bevelich und anbringenn gleich als werenn wir eigner personn zugegenn gentzlichenn unnd vollen glaubenn beimossenn. / Nichtsminder hierin als der freundt unnd nachpar inn betrachtung unnserer notturfft ertzeigenn unnd beweisenn. / Das wollenn wir umb Euer Lieb freuntlichenn zubeschuldenn idertzeit gewogenn befundenn wordenn. /

Datum Konigspergk, denn VII Aprilis anno etc. im XLIII-ten.

Vonn Gotts gnaden Albrecht marggraf zu Brandenburgk, in Preussen zu Stetin, Pommernn, der Cassubenn und Wenden hertzogk, burggraff zu Normbergk und furst zu Rugenn manu propria subscripsit