Reverendissimo in Christo patri et Domino, domino Iohanni Dantischo episcopo Chulmensi serenissimarum maiestatum Poloniae [oratori] dignissimo etc. Domino et fratri honorando

Reverendissime in Christo pater et Domine, mi domine et frater plurimum observande. Solita commendatione praemissa.

Rogatum me habuit per litteras dominus Andreas Cardutius serenissimae maiestatis reginalis, dominae nostrae clementissimae, alumnus fidelisque subditus, ut eum Vestrae Dominationi Reverendissimae commendarem sperans meam commendationem illi plurimum profuturam. Quamobrem quo efficacius possum, Dominationem Vestram Reverendissimam obnixius rogo, velit eundem dominum Andream mihi affinitate et benevolentia non vulgari convinctum commendatum suscipere eique suo patrocinio et favore adesse apud sacram caesaream catholicamque maiestatem, sub cuius felicissimo vexillo militans apud hostes captivus per multos menses extitit fuitque ibi satis indigna passus. Non petit quod obtineri non potest, sed quod cum gratia caesaris facile impetrari debet.

Plura non scribam ne videar diffidere de singulari benevolentia Dominationis Vestrae Reverendissimae erga me quae procul dubio teneat, quicquid erit in ipsum dominum collatum, in me collatum fore. Commendo tandem me et obsequia mea eidem Vestrae Dominationi Reverendissimae, quae felicissime valeat. De negotiis non scribo ad praesens, nam satis superque scripsi his diebus proxime praeteritis et litteras tuto pervenisse credo.

Datae Bari, die 8 Aprilis 1531.

Eiusdem Vestrae Reverendissimae Dominationis ad vota paratissimus Ludovicus Aliphius etc.