Ornatissimo ac eloquentissimo viro Iohanni Dantisco, oratori regis Poloniae, amico ac domino imprimis carissimo

Salutem.

De sphaera negotium, quod mihi dedisti, Vir Ornatissime, ita curabitur, ut octo ab hinc diebus suis perfectam numeris Conrardus Goglenius ad Dominum deferet, idque certum erit. Porro de Tuo humanissimo in me animo, quem admirabili candore aliquot dies in me declarasti, non sine stupore quid aut dicam, aut sentiam, saepe mecum post domini abitum agitavi. Rarum in nostris exemplum tam comis, tam apertus, tam denique nullo sibi conscius fuco animus, praecipue in eo, quem fortuna splendidiore loco dignata est. Sed desino mirari, quod domestico hoc utimini more. Ego quidem cum non alio modo possum Tuam in me voluntatem demereri, gratias habeo et ago immortales precorque illud, ne aliorsum, quod (cum me vocari iusseras in ientaculum) non affuerim, accipias, quam quod et negotiis fuerim impeditior, et praecedentis diei compotationem necdum satis edormiveram, et iam tardius advenerim, ut puta, cum abiisse dicereris.

Tu, Vir Humanissime, postremo id apud te de me statuas velim, in omnibus his regionibus, licet indignus, qui ad quaecumque praeceperis, modo vires admittant, promptior sit Bartholomeo esse neminem.

Datae Lovanii, 3 Februarii anno 1531.

Bartholomeus Gravius tibi obsequentissimus