Dem durchlauchten, hochgebornen fursten und herren, herren Albrechten, von Gots gnaden marggraff zu Brandenburg, / in Preussen, / zu Stetin, Pomern, der Cassuben und Wenden hertzogk, burggraff zu Normberg und furst zu Rugen, unserm hochgunstigen, lieben herren unnd freunde

Durchlauchter, hochgeborner furst, / hochgunstiger, lieber herre unnd freundt. / Unsere freuntliche unnd vleis willige dinste zuvoran. /

Aus Ewer Furstlichen Durchlaucht schreiben, das den XVIII dits mondts zu Konigsberg gegeben und uns gestriges tags worden, / hab wir Ewer Furstlichen Durchlaucht notige sorgfeldigheit diesen landen zu gutt, / und auch was den ersamen vom Elbing zuantworten / radts von uns fordert, / vorstanden, / solchs auch, / dieweil uns Ewer Furstlichen Durchlaucht brieff hie nach fi(!)inden, / ins mittel den koniglichen rethen zubedencken vorbracht. / Befinden aber, das der mehrer teill dorzu gestimpt, / den vom Elbing die ausschiffung so freÿ solde sein, wie den von Dantzk, / und sich beschwert, das Ewer Furstliche Durchlaucht das tieffe widder alten gebrauch und recessen / ane zulos koniglicher maiestet, unsers allergnedigisten herrenn, / und dieses koniglichen raths mit wissen unnd willen / geschlossen, / anzeigende, das kortz zuvor Ewer Furstliche Durchlaucht von der Mymel und andern ortern auszuschiffen getreidt und andere wahre het gestattet, / welchs wir, / wie es bei uns ÿm rate vorhandelt, vortrauter weiss Ewer Furstliche Durchlaucht nicht habe mogen vorhalten. / Hieraus, was den vom Elbing widder zuschreiben sei, / hat Ewer Furstliche Durchlaucht leichtlich zuermessen. / Es wirt auch derhalben der edel, ernvhest her dantzker castellan, / der sich zu Ewer Furstlichen Durchlaucht zubegeben diese tage vorgenommen, / hirinne von der hern rethe wegen weitern bericht, / und sonst auch was wir uns mit ym Ewer Furstlichen Durchlaucht zum besten trewhertziger meÿnung beredt, / mitbringen, / von dem / vil andere sachen, die aus der federn nicht wollen, Ewer Furstliche Durchlaucht wirt vorstehen, / hirumb wir fast ym ende dieser tagefart, mit geschefften beladen, / dis unser schreiben ins kortze gestelt, / freuntlich bittende, in angefangener gunst gen uns uffzunehmen, / hiemit wir uns Ewer Furstlichen Durchlaucht mit vleis befelhenn.

Datum Marienburg, den XXI Maÿ M D XL.

Joannes, von Gots gnadenn bischoff zu Ermelandt qui supra manu propria subscripsit