Dem durchlauchten, hochgebornen fursten unnd hernn, / [hern] [Albrech]t, marggraffen zw [Brandenbur]g etc. und herczog in Prewssen, / unserm freuntlichen, lieben hern und nachparnn /

Durchlauchter, hochgeborner furst, / hochgunstiger, lieber her und freundt. / Meÿnn freuntliche, willige dienst zuvoran. /

In negst vorgangen tagen, do hie beÿ uns war Ewer Irbarkeit cammermeister, hab wir im geben / mit andren ein supplicacion und handtschrifft uber hundert mark / des wolgeborn, in Got vorstorben hern Slicks, houptman zw Osterrode, / welche er unserm underthan, burger zwr Lobe, / Klein Macz genent, / geligens geldes / schuldig war, / bittendt, das solch geldt gedochts Kleines Maczs nochgelosnen witven und kÿndern aus befelchs Ewer Irbarkeit beczalt wurde. / Hir uff uns Ewer Irbarkeit cammermeister durch sein schreiben vortrost, Ewer Irbarkeit wurdt solch scholdt zwbeczalenn befhelen. / Derhalben wir Ewer Irbarkeit vor unsere underthan mit hohem fleis bitten, / wolde vorschaffen, / das solche hundert margk noch laut der hantschrifft beczalt wurden. / Beschulden und vordinen wir fruntlichen umb Ewer Irbarkeit alczeit gerne. / Wir haben ouch negst mit magistro Amando Ewer Irbarkeit geschriben / was die Pfalcz etc. belangt. / Was Ewer Irbarkeit bedunckt weiter durch uns zwthun, / erbit wir uns willig. / Got der almechtige gebe Ewer Irbarkeit in langer gesuntheit und gelugseligem regiren alle gelugkseligheit. /

Datum uff unserm slosse Lobaw, den XI tag Martii 1534.

Joannes, von Gots gnaden bischoff zw Culmen und administrator zw Pomezann /