Dem durchlauchten, hochgebornenn furstenn und hernn, / [hern] [A]lbrechten, marggraffen [zu] Brandenburgk etc. und herczogen inn Prewssenn, / meÿnnem freuntlichen, lieben hernn /

Durchlauchter, hochgeborner furst, freuntlicher, lieber her. Meÿnn freuntliche, willige dienst zcuvoran. /

Wann ich mich nicht sunderlich uff Ewer Irbarkeit hochenn furstlichenn vorstandt vorlisz, / het ich mich dis schreibens nicht angenhomenn, / darzcw mich christliche / und meÿne geÿstliche pflicht thut vorursachen. / Bitt derhalbenn mit keÿner unguttigheit dis meÿnn zcuvorsichtlich schreiben zcwvormerckenn. / Ich habe nicht sunder mithleidenn / meines guttenn freundes, / des ernvhestenn Olbrecht Fingk, / Ewer Irbarkeit underthann, zcwfhal / vonn eines entleibten mans wegenn / vornomenn, / dardurch her inn Ewer Irbarkeit ungenad sold sein gefallenn / unnd nicht wirt sicher zcwgelossenn / seinn vorantwurttung zcwthun, / so ouch / Ewer Irbarkeit lande / unnd seinn gutter / meidenn musz. / Wirt weitter derhalbenn vorhaltenn, Ewer Irbarkeit negst gehtann geboth, / was die dinstparkeit der rustung betrifft, / nicht noch zcwkomenn. / Und so dann Ewer Irbarkeit wie ein recht vorstendiger furst wol weis, / das berichtung unnd antwurt zcwthun, / wie billich, / idrem sol zcwgelossenn werdenn, / bitt ich Eur Irbarkeit mit hohem vleisz, / wolt gedochtem Albrechten / unnd seinem swoger / freÿ christlich geleit gebenn, / das her vor Ewer Irbarkeit, oder wem das wurd bepholen, / sein kegenn rede / unnd nottliche entschuldung, / donebenn auch seiner dinstpflicht genug mocht thun, / beschulde unnd vordine ich solchs alleczeit gerne fruntlich umb Ewer Irbarkeit, / die Gott der allemechtig inn langweriger gesuntheit unnd gelugseliger regirung und zcwnhemenn thu bewarenn. /

Datum uffm slosse Lobaw, denn 5. Septembris 1533.

Ewer Irbarkeit williger

Joannes, bischoff zu Culmen etc. manu propria