GStAPK, HBA, C1, No. 1103, f. 3v

Dem durchlauchten hochgebornen fursten und herrn hern Albrecht(en) von Gots gnadenn marggraffenn zcw Brandenburg / inn Preussen / zu Stetin / Pomern / der Cassubenn unnd Wenden hertzog / burggraven zu Nurnberg / und fursten zu Rügen / unserm hochgunstig(en) lieben herren und freunde

In furst(liche)r d(urchlauch)t selbst eigene hende etc.

GStAPK, HBA, C1, No. 1103, f. 1r

Durchlauchter hochgeborner furst hochgunstiger lieber herr unnd freunnd. / Unnsere freuntliche unnd vleißwillige diennste zuvornn. /

Wie wir zuvor E(uer) F(urstlichen) D(urchlauch)t auf ihr schreyben an unns / wegen der legation an ro(misch)e kay(serlich)e m(ajeste)t / durch unser anndtwurt zuvorstehen gebenn / das wir dassulbte / wie von E(uer) F(urstlichen) D(urchlauch)t an unns begeret / mit unnserm eigen botten bey ko(nigliche)r m(ajeste)t unnserm allergnedigisten herrn / unnd anndern ferrn in der Chron gesucht und gefurdert / hettenn / dorneben E(uer) F(urstlichen) D(urchlauch)t auch vorheischen / was unns auf solchs unnser schreybenn zur anndtwurt werden wurde / das dersulben mit den ersten wissen zulassenn. / So ist gestern obendt unnser bothe / den wir derwegen aufgeschicket / widerum hieher an unns gelanget / unnd unns diß anndtwurt von ko(nigliche)r ma(jeste)t / unnd dem hochwirdigenn in Got herrn Samueli bishoffn zu Crackow / unnd des reichs Polen cancellarium / eingebracht / wie hier eingelegte copienn vormeldenn / dieweill aber darinnen angezeigt (das unns den fast ungeleublich / auch unnsere bitte bey ko(nigliche)r ma(jeste)t gehindert hat /) als solte E(uer) F(urstliche) D(urchlauch)t darinn vorwilligt unnd nachgegeben habenn / das der großmechtige herr siradische woiwode solche botschfft alleine auf sich nheme / unnd an r(omisch)e kay(serlich)e m(ajeste)t zuge / bitten wir freunntlich unns in dem zuberichten / den solchs wil in unns nicht das dem so sey / sunderlich dieweil GStAPK, HBA, C1, No. 1103, f. 1v E(uer) F(urstliche) D(urchlauch)t so fleissig bey unns angehalten / damit der großmechtige herr marienburischer woiwode von gedachter lagation / welchs wir den auch gerne umb vieler nothwendiger ursachen willen / gesehen hetten / gesundert wurde.

Unnd haben diß E(uer) F(urstliche) D(urchlauch)t / der wir idere zceit freuntlich und superinscribed⌈undund superinscribed⌉ welferige dienst zuerczeigen gewilligt seinn / nicht worhalten wollenn. / Hiemit diesulbe E(uer) F(urstliche) D(urchlauch)t dem ewigen Got mit langweriger gesunndtheit unnd gelucklichem regiment zuerhalten bevelende.

Dat(um) Heilsberg, IX Septembris M D XLVII.

Ioannes von Gots gnaden bischoff zu Ermelandt etc. qui sup(ra) ma(n)u p(ro)pria s(ubscrip)s(i)t