GStAPK, HBA, C1, No. 1036, f. 3unnumbered

Dem durchlauchtigen hochgebornen fursten und herren herren Albrechten von Gottes gnaden marggraffen zu Brandenburg in Preussen / zu Stettin Pommern / der Cassuben und Wenden hertzogenn burggraffen zu Normberg und fursten zu Rug(en) / unserm hochgunstigen lieben herren und freunde

GStAPK, HBA, C1, No. 1036, f. 1unnumbered

Durchlauchtiger hochgeborner furst hochgunstiger lieber her und freundt. / Unsere freuntliche und vleiss willige dienste zuvoran. /

Uns ist gestrigs tags E(uer) F(urstlichen) D(urchlauch)t shreiben geworden / in welchem uns / des forigen das uns vor E(uer) F(urstlichen) D(urchlauch)t negstem auszoge nach deutzshen landen zukommen / betreffend unser capittel zur Gutstadt / erinnert / und hetten wol gemeint / das E(uer) F(urstliche) D(urchlauch)t ein gnugen solt gehabt haben / an dem / das gemelt capittel uf dieselbe zeit E(uer) F(urstliche) D(urchlauch)t beantwort / und durch etliche aus irem mittel zuberichten uns zu der zeit ist vorgelesenn / auch hab wir in sonderheit erforschen thun / wie es umb diesen handel / solcher privilegien und kirchen gerett / das E(uer) F(urstliche) D(urchlauch)t fordert / ein gestalt habe / nichts aber anders konnen erfaren / dan was gedachtes unser capittel E(uer) F(urstlichen) D(urchlauch)t zugeshrieben / dorauff auch beharret. / Wirt aber jemant dasselbte unser capittel in dieser ader andern sachen worinne mit recht vor uns anziehen / wolle wir / wie ordentlicher richter / der gerechtigkeit pflegen / und wie wir shuldig vorhelffen / domit unnottig sei andere wege / aus der billigkeit / zusuchen. / Wollen uns auch / so dieser handell zu recht wirt gedeien / und des unser gemelt capittell nicht kan erlassen sein / E(uer) F(urstlichen) D(urchlauch)t zu gefallen / dermassen halten / das an uns nicht anders GStAPK, HBA, C1, No. 1036, f. 2unnumbered gespurt mug werden / dan was der gotlichenn gerechtigkeit gemess / und die vor augen habennde / nachsei gegangen. /

Solchs hab wir E(uer) F(urstlichen) D(urchlauch)t / der freuntlichen gunst wir uns bevelhen / uff ir shreiben wilferiger weis widderumb anzuzeigen nicht wollen unterlassen. /

Dat(um) Heilsberg denn VI Februarii / M D XLVI. -

Ioannes von Gottes gnaden bischoff zu Ermlanndt / qui sup(ra) ma(n)u p(ro)pria s(ubscrip)s(i)t