GStA PK, HBA, C1 No 788, 2 unnumbered

Dem durchlauchten, hochgebornen fursten und herren, hern Albrechten, von Gots gnadenn marggraff zu Brandenburg, / in Preussen, / zu Stetin, / Pomern, / der Cassuben und Wendenn hertzog, burggraff zu Normberg und furst zu Rugen, / unserm hochgunstigen, lieben hern und freunde /

GStA PK, HBA, C1 No 788, 1 unnumbered

Durchlauchter, hochgeborner furst, hochgunstiger, lieber her und freundt. / Unsere freuntliche unnd vleis willige dinste zuvoran. /

Wir haben heut dato E(wer) F(urstlichen) D(urchlauch)t schreiben / belangende unsern underthan und lieben getreuen, den erbarn Cristoff von Wantkaw, / erhalten, / doraus E(wer) F(urstlichen) D(urchlauch)t amptsmans zu Sehesten eingebrachten bericht vornommen. / Wollen denselben auch berurtem unserm underthan, / sich dornach zu achten, / ferner zuschicken etc.

Von neuen zeitungen, / uber die so wir E(wer) F(urstlichen) D(urchlauch)t jungst zugeschrieben, / ist bei uns keine. / Sonst solten die E(wer) F(urstlichen) D(urchlauch)t, / die wir in gluckseligem zunehmen / und langwerdentem regiment / gotlichen gnaden entpfelen, / unvorhalten blieben sein. /

Dat(um) Heilsperg, den XXX Augusti M D XLI.

Ioannes, von Gots gnaden bischoff zu Ermelandt /