GStA PK, HBA, C1, No 557 2 unnumbered

Dem durchlauchten, hochgebornen fursten und hern, hern(n) Albrechten, / von Gots gnad(en) marggraff zu Brandenburg, in Prewssen, zu Stetin, Pomern, der Cassuben und Wenden hertzog, burggraff zu Normberg und furst zu Rugen, / unserm hochgunstigen, lyben hern(n) und freundt

GStA PK, HBA, C1, No 557 1 unnumbered

Durchlauchter, hochgebornner furst, hochgunstiger, lyber herr unnd freundt. / Unnser freuntliche, wÿllige dinnst zuvorann(n).

Uns hat der hochwirdige in Gott unser freuntlicher, lÿber bruder der her bischoff zcu Colmeshe copeÿ seins antwurts an E(wer) F(urstliche) D(urchlauch)t zugeschickt, / doruff wir gleichmessig beruhenn(n), / mit allem erbiethen dar in berurt. / Wÿ aber dess wÿltschiessens halben E(wer) F(urstliche) D(urchlauch)t uns geschrÿbenn, / antzutzeigenn wer dÿ werenn etc., wir werdenn glawbwirdig bericht, / das solchs von der Balge und aus denn ortern, / auch vom adel, nicht weit von uns gesessenn, gesche. / So derhalben E(wer) F(urstliche) D(urchlauch)t, wer dÿ sein, / wirt wollen recht erfarnis haben, / ist E(wer) D(urchlauch)t leichtlich zu bekomen. / Uns zcimt nicht, ÿmands in E(wer) F(urstliche) D(urchlauch)t ungnad zu brengen etc.

Wir haben auch schrifft von hove, / welche uns warlich betrubt, / wÿ E(wer) F(urstliche) D(urchlauch)t guther diner der her Nÿbschitz mit swerem feber befallen niderlige. / Gott der almechtig helffe im wider uff. /

Das under kantzler ampt mit dem sigel ÿst herrn Samueli Maczeiowski gebenn. / Es tzihen auch ko(nigliche)r m(aieste)t, u(nsers) a(llergnedigsten) hern(n), botschaffter an Thurckenn, / an ro(mische) ko(niglich)e m(aieste)t, und her Laski an kurf(urstliche) d(urchlauch)t zu Brandenburg. / Sonst hab wir nichts sonders. / Thuen uns himit in E(wer) F(urstlichen) D(urchlauch)t gunst befelhenn. /

Datum(m) Heÿlsberg, XIX Marcii M D XXXIXt(en).

Ioannes, von Gotts gnaden bÿschoff zu Ermelandt

Io(anne)s e(piscopus) Warmien(sis) ma(n)u p(ro)pria s(ubscrips)it