BCz, 1606, p. 516

Dem erwirdigenn ihnn Goth unserm besondern lieben freundt unnd nachparnn, herrenn Johansenn bischoffenn zu Ermelandth etc.

BCz, 1606, p. 515

Unnser freuntlich dinst zuvornn. /

Erwirdiger ihn Goth besonder lieber freundt unnd nachpar. /

Nachdem sich etliche irrige gebrechenn etlicher grenitzenn halben zwischenn denn erbarnn unnsernn underthanenn unnd lieben getreuenn Hansenn Spiegelnn zeigernn diss brieffs / ahn einem / unnd Thoma Sokoloffski von Falckenhain anders teils / zwistich erhaltenn, / also das dieselbigenn gebrechenn one orteilung unnd beziehung ihrer grenitzenn beigelegt werdenn nit wol konnen, wie E(uer) L(ieb) ferner von obberurthem Hansenn Spiegelnn muntlich zuvornhemenn werdenn habenn. / Dieweil dan unnser underthanenn gutter ahnn E(uer) L(ieb) lannd unnd grenitzenn rurenn unnd dieselbigenn mit E(uer) L(ieb) vorbewust unnd willen gegangenn / unnd bezogenn werdenn mussenn. /

So gelangt ihnn E(uer) L(ieb) unnser freuntlich bith, / dieselbenn wollenn zu orterung unnd beziehung solcher grenitzen auffs ehrst unnd furderlicht, / als es E(uer) L(ieb) immer zuwegen prengen konnen unnd derselbenn gelegenn sein will / einenn gereumen tag ernennenn unnd darzu verordnenn. / Auff das solche gebrechenn von wegen der grenitzenn zwischenn unnsernn underthanenn, / damit weitterer zanck, widerwill / unnd uneinigkeit vorhutet, / hingelegt werdenn / unnd ides teil, was sein oder nicht wissen moge. / Wie wir dan ghar nicht zweiffelnn, / E(uer) L(ieb) als der freuntliche nachpar sich gutwillig hierinenn erzeigenn unnd beweisenn werdenn. / Das wollen wir hinwider umb E(uer) L(ieb), die wir hiemit gotlichem schutz unnd schirm thun bevhelenn, / gantz freuntlichenn vordienenn. /

Dat(um) Konigspergk, den 10 Octobris anno 1540.

Vonn Gots gnadenn Albrecht marggraff zu Brandenburgk, ihn Preussen, zu Stettin, Pomernn, der Cassuben unnd Wenden herzog, burggraff zu Nurmbergk und furst zu Rugen etc.