Reverendo in Christo patri, domino Ioanni Dantisco electo Culmensi, oratori et consiliario nostro, sincere nobis dilecto

Sigismundus Dei gratia rex Poloniae, magnus d[u]x Lithuaniae, Russiae, Prussiae, Masoviae, etc. dominus et he[re]s

Reverende in Christo pater, sincere nobis dilecte.

D[udum] ... [petiv...]erat serenissimus dominus Ferdinandus, Hungariae et Bohemiae etc. rex, affinis noster [ca]rissimus, ut illustrissimam dominam Hedvigim, filiam nostram primogenitam, nemini desponderemu[s], nisi prius de conubio illius consilium a maiestate sua haberemus, cuius rei nos memores, cum non multo ante de desponsanda illa illustri domino Lodovico, Bavariae duci, sollicitati essemus, firmare in hoc consilium nostrum non potuimus, tametsi illam viro iam tradere et ipsius et nostrae rationes vehementer exposcunt. Quare vobis committimus, ut serenissimo domino regi Ferdinando id, quod nobis de illustri domino duce Bavariae propositum est, exponatis et a maiestate sua petatis nomine nostro, ut nobis sententiam suam in hoc declaret, vel si maiestati suae conubium hoc non placeret, consulere dignetur, sicuti melius illustrissima filia nostra collocari possit, idque, quod vobis per maiestatem suam responsum erit, nobis hoc cubiculario, simul et omnia, quae istic gerantur et tractentur, perscribatis, et bene valete.

Datae Cracoviae, die prima Iunii, anno Domini M-o D-o XXX-o, regni vero nostri anno XXIIII-to.

Sigismundus rex subscripsit