Venerabilibus Dominis Praelatis Canonicis et Capitulo ecclesiae nostrae [Varmi]ensis, fratribus sincere nobis dilectis

Ioannes Dei gratia episcopus Varmiensis

Venerabiles Domini, fratres sincere dilecti.

Quod illa, cui ditio nostra est interdicta, ad Fraternitates Vestras se contulerit quibuscumque etiam de causis, non admodum probamus, verendum enim est, ne, quibus modis dementavit illum, qui pauloante e vivis cessit, quempiam alium e Fraternitatibus Vestris occupet. Quod, si illi apud vestrates commorationem concedere statuerint, in Fraternitatum Vestrarum est arbitrio, satius tamen esse putaremus longius arcere, quam admittere eiusmodi pestis contagionem, quae quantum decori ecclesiae nostrae obfuerit, Fraternitatibus Vestris non est incognitum. Quas feliciter valere optamus.

Datae ex arce nostra Heilsberg, XIII Septembris M D XLIII.