Dem hochwirdigsten in Gott furstenn unde herren, hern Ioanni, vonn Gottis genaden / des loblychen stichts Ermelanth bysschaff etc., meynem genedigen hochgelybten herrennn, dynstlich.

Hochwirdigster in Gott Furste, Genediger Herre,

Ewer Furstlichen Genaden szeynth meyne demuttige, gancz borethwyllige, unvordrosszene dynste zcuvorann / unde in allem dynstlich bepfholennn.

Allergenedygster Herre. /

Ich byn danckbaer kegen Ewer Furstlichen Genaden vor alle ere, / fruntschafft / unde begabungen, / dy Ewer Furstlichen Genaden meyner hauszfrowen erczegeth haben. / Der almechtige Gott szey Ewer Furstlichen Genaden beloner.

Genediger Herre, zceythunge ist hy mangerley von keyszerliche mayestatt, / dy Ewer Furstlichen Genaden mhe habe, dan hy vyll loff...h geszageth wyrth. / Gott vorley szeyne genaden / unde szeyne mayestat victoria.

Genediger Herre, Gotth habe lopp, / saltcz ist dysz joer szo vyll gekomen, das unszer bo... nicht vyll mher rahum habennn / unde teglich mhe kumth.

Genediger Herre, nowge zceythunge komt ..., das dy Schatten myth XXX milia man szey ge[komen] in Engelanth / unde der koningk von Fran[ck]reych komth in zcu holffen myth ethlichen sch[yffen]. Was dovon wyrth, mhack mhen erfaren. Unde unsze schyffen szeyn ethliche gestreffeth / vonnn vorloffenen dyben worden, dy vyll in der szee szeynnn. Gott vorley szeyn genaden unde fuge alle dynge zcum besten.

Domytthe ich Ewer Furstlichen Genaden dem almechtigen Gotte thu bepfholen, der friste unde erhalte Ewer Furstlichen Genaden zcu langen tagen im gl[uck]szeligen geszunden regimente.

Datum Danczke, am 6 Augusti anno 1547.

Ewer Furstlichen Genaden guthwylliger u[nde] gehorszamer dy[ner] M[acz Platen]