AAWO, AB, D.5, f. 56r

Hochwirdiger furst, gnediger her.

Mein gantz willig dienst sein e f g zu aller zeyttberait.

Gnediger her.

Ich hab uff 19 mai E(uer) F(urstlichen) G(naden) geschriben mit her Fabian Demerau was noth ist gewesen hoff derselb brieff sol e f g gewis werden. Mir ist seyder ain brieff worden von E(uer) F(urstlichen) G(naden) mit dem Moritz, E(uer) F(urstlichen) G(naden) diener, des datum 13 mai in Heylsperg darin ich hertzlich gernn vernomen hab e f g widerum zu gesundthait ist komen der almechtig gott verleich es aufflange zeytt hab vernomen das e f g durch ko Mt ist erfer= dert in potschafft zu ziehen zu o ko Mt ist gleich wol etwas schwer aff e f g nun kan man dem nicht thun e f g wirdt es zu dem pösten wenden.

Item was ain zalter belangt hat her Hans aichler zwen koufft fur e f g vom her Nipschitz die der Moritz mit pringt darfur hab ich im zalt 50 flor vng in gold got gebe das sy e f g wol gerothen sy sollen nicht posz sein.

Item was aber belangt was e f g mein herren hie schuldig sey kan ich e f g noch kain rechten beschaid schreyben die weyl die expedicion von Rom noch nicht komen ist on die selben wirdt es sein in 240 flor vngeferlich.

Item was die guldn ringe belangt hab ich e f g nechst mol gesandt mit dem her febran de meran hoff er sol e f g noch begreyffen.

Item aff die vergangen tag sein die bullen aff die 4 bisthub als entbisthumb Craca Kletzko vnd prymsel komen hett mich versehen der treoyofftki solt e f g bullen auch procht haben vnd auff das bysthub Culmensi ist nicht geschehen was gehindert hatt wais ich nicht Qrings Galler schreybt mir sollen mit erstem gesandt werden der Theodoricus de Rheden solt ja e f g schreyben was die vrsach wer das es so gar langsam zu gath Item was gelt belangt e f g an ro ko a hoff fur zestrecken wirt wol geschehen so anderst e f g die ko Mt zu Presla erlangt dan meine herrn AAWO, AB, D.5, f. 56v hoff haben an ko mt kain diener Ich will dem lorentz flayscher meiner herren diener deshalben schreyben gen Presla.

Item dem Casper Hannou hab ich geben zu sener aus richtung flor 6 g 10 dem Moritz zerung 4 flor so er anderst nicht mer wirdt begeren Der Borentz des maister maien sun zeucht auff disz mol nicht mith Casper wirdt e f g die vrsach anzaigen Sunst nichtz sonders auff dis mol dan womit ich e f g kan ze dienst sein findt mich e f g alweg willig vnd gott mit vns allen.

Amen.

Datum zu Craca, am 26ten tag mai 1538.

E f g gantz williger Jörg Hegel