Denn ersamenn unnd namhaftigenn herren burgermeistern unnd rathmannen der koniglichen stadt Dantzig, unsernn besunderen, guttenn freundenn /

Unserenn freuntlichenn grus und alles guts czuvoran. / Ersame, namhaftige hernn, besunder gutte freunde.

Das Ewer Erbarkeit fleisig sunder ablassenn / bei dem hernn leslauschenn / auf der hernn redte brief zuantwortenn / haben angehaltenn / und letzlich auch ein antwort, / welches wir bei diesem Ewer Erbarkeit schreiben bokommen, / erhaltenn, / ist von Ewer Erbarkeit nicht allein wol bedocht wordenn, / sunder auch sher nutzlich, / den wir dadurch seiner liebden gemut erfharenn / und die ursachenn, worum die closter eingenomen worden, erkundigt, / welche den viel anders lautenn, / den die uns zuvor seindt zukommen / und angegebenn. Schickenn darum Ewer Erbarkeit auf dersulbtenn bit / hiebei gelegt die abschrift gedochts hernn bischofs antwurts. Und dieweil darin vormeldet, das in dem cartheuser closter / nicht mher, dan drei bruder gewesenn, / do wir doch erstlich von czhenn / und darnoch von vierczhenn, / die man alda gefunden hette, / seindt berichtet wordenn, / bittenn wir freuntlich, Ewer Erbarkeit wolten sich nicht beswerenn, / sunderlich so ihnen das closter nahent gelegenn / und uns, wie viel bruder man alda gefunden und gewesenn seindt, / auch sunst wie es damit allenthalben ein meinung habe, / grundtlichenn berichtenn. Den wo dem so were, / das da nicht mher, dan drei bruder gewesenn, / duncket uns nicht gerathenn sein, / das man der hernn redte brif, / davon wir in unserm negsten schreiben an Ewer Erbarkeit gemeldet, / an konigliche maiestet thete fertigenn, / sunder were besser, das der angehaltenn wurde / bass auf fernere und grundtliche erkundung, / damit wir nicht bei koniglicher maiestet antruffenn, worin uns Ewer Erbarkeit, / die wir gotlichenn genadenn bovelenn, / ihr antwurt aufs erste und furderlichste / unbeswert wollen zuschreiben und wissenn lassenn.

Datum aus unserm schloss Heilsberg, den XXVI Octobris MDXLVI.

Joannes, von Gots genadenn bischof czu Ermlandt