Denn ersamen und namhafftigenn hern burgermeister und rathman der koniglichen stad Dantzig, / unsern besondern, guthen freunden.

Unsern freuntlichen grus und alles guts zuvoran. Ersame, namhafte herren, besondere, gute freunde. /

Hiebei ist ein brieff an Ewer Erbarkeit von dem hochwirdigsten hern bischoff von Chelm, / benumpt zu Plotzke und des reichs undercantzler, doraus Ewer Erbarkeit wirt vornemen, / das wir das jenige, so wir seiner lieb mit andern zugeschickt, / geworden etc. Wir mugen auch Ewer Erbarkeit clagweis nicht bergen, das wir negst im winter Bartholmes Bardun, dem orgelmacher, funfzig marg uff ein werg gegeben, / doruff er von den von Melsack auch zuvor so vil entpfangen, / uns aber angezeigt, / das sie die von Melsack ir gelt widderfurderten / und des wercks nicht begertenn. So hat gemelter Bardunn solche funfzig marg von uns den von Melsack nicht zugestelt, / die er von uns entpfangen / und behelt solche hundert marck uns und den von Melsack vor, / macht aber uns und in nichts dergleichen, wie zugesagt. / Dieweil wir dan vorstehen, wie wir auch zuvor von im erfaren, / das wenig warheit in im ist, / des sich in solchem alter einer entstehen solt, so ehr in im were, / ist unser bitt, Ewer Erbarkeit wolten solche unser funfzig marg, / die er dergestalt mit unwarheit von uns gebracht, / widderumb von inn furdern und uns zu gut enthalten, auch solchen losen man weiter niemants in koniglicher stad bei Ewer Erbarkeit lassen betrwgen, / das wir umb Ewer Erbarkeit und die iren mit aller gutwilligheit zubeschulden sein erbottig. Gott in sein gnad bevolhen.

Datum aus unserm schlos Heilsberg, XXV Iunii M D XLI.

Joannes, von Gots gnaden bischoff zu Ermelandt