APG 300, 53, 267, p. 134

Den ersamen und namhafftigen herren burgermeister und rathman der koniglichn stad Dantzig, unsernn besondern guthen freunden.

APG 300, 53, 267, p. 131

Unsern freuntlichen grus und alles gutes zuvoran. Ersame, namhaftige hern, besondere, gute freunde.

Wie wir negst E(wer) E(rbarkei)t von wegen unsers pauern Albrecht Nitzman aus unserm dorffe Glottaw geschrieben, schicke wir diesen unsern molschreiber, in von E(wer) E(rbarkei)t zufordern. Domit wir aber uns nicht zu weit in dieser sachen, / nach laut E(wer) E(rbarkei)t schreiben im jungsten an uns ausgangen, thetten eynlassen, doraus zwuschen uns und E(wer) E(rbarkei)t etwan ein ungutigheit, das wir jo nicht gerne wolten, mochte erwachssen, / dieweil wir von erster unser ankunft in diesem stande ins landt / uns gen E(wer) E(rbarkei)t also den, die unserm vaterlande, das uns lieb ist, vorstehen, / wie wir nicht anders wissen, / wol haben vorhalten auch solchem anfange gneigt nachzukommen, wolte wir uns aus solchen leichten ursachen gen E(wer) E(rbarkei)t nicht lassen anfuren und bewegen. Haltens auch dovor, E(wer) E(rbarkei)t werden unsere freuntliche zuneigung und gemut, von uns in allewegen gespurt, hocher dan solchen unsern pauern achten und seinet halben nichts vornehmen, das der billigheit und uns soldt widdrig sein. Domit aber E(wer) E(rbarkei)t offentlicher erkennen, das wir jemants schwerheit anzuthun nicht begirig, / und auch domit under uns und E(wer) E(rbarkei)t die alte freuntschafft unvorruckt bleib, habe wir gemeltem unserm molschreiber volle APG 300, 53, 267, p. 132 macht und auch ein freybrieff mitgegeben, / derumb sich mit im in unserm nahmen gedachter unser pauer wirt wissen zuvortragen, welchs E(wer) E(rbarkei)t, / die wir Gotte befelhen, / in gewonter zwuschen uns freuntlicheit anzuzeigen nicht haben mugen underlassen.

Dat(um) aus unserm schlos Heilsberg, den VI Decembris M D XL.

Joannes, von Gots gnaden bischoff zu Ermelandt