Wie wir gerne wolten, das es Ewer Erbarkeit richtig allenthalben zustunde, sein wir vorursacht vor diesen Ewer Erbarkeit mitburger ⌊Hans Holsten⌋, / dem wir mit gnaden gewogen, / zu schreiben und Ewer Erbarkeit des erinnern, wie es uf negst vorgangener ⌊tagefart⌋ in seiner sachen des testaments von seinem ⌊vater⌋ herkommende vorblieben, / also nemlich, das hirinne still wurd gehalten, / bis uff der ⌊hern landt und stedte⌋, / nach laut koniglicher comission, / uff zukunfftiger tagefart erkentnis wir dann, / auch der recess under des landes siegel mitbrengt, / den Ewer Erbarkeit bei sich haben, hyrumb wir freuntlich synnen und bitten gemelten Hannsenn Holsten solchen recess widder zugeben und mit dem ⌊erbarn gerichte⌋ handlen, dieweil die sache so vorfast und nach koniglichem befelh bei den herren landt und stedte um rechte henget, das weiter nichts dorinnen wurd vorgenommen, domit etwan schwerheit und anders, / das doraus erfolgen mochte, gemieden wurde und nachbliebe, welchs wir Ewer Erbarkeit, der wir vil guts und nutz gonnen / und dieselbte auch gotlichen gnaden befelhen, freuntlicher weiss nicht habenn mugen vorhaltenn.
