Unsernn fruntlichenn grues mit erbittung, was wir liebes unnd guts vormugenn, zuvoran. Ersame, namhafftige hernn, gunstige freunde. /

Wir haben dem hochgelerthenn hern doctornn Reÿneck, / unser swester mann, / etliche gewerbe an Ewr Erbarkeit zurtragenn befholenn, was etliche schrifft an konigliche maiestet unnd unser haus, / ouch unser swester kinder hendel belangeth. / Bittenn derhalben inn gutlich horenn und glauben gebenn, doneben in unsren geschefftenn im behülfflich sein wolth. Vorschulde wir umb Ewr Erbarkeit, die wir Gotte dem [all]mechtigenn inn langweriger gesuntheit unnd gelugseligem zcwnhemen thun befhelen, alczeit gerne.

Datum Grawdencz, 7 Octobris anno domini 1533.

Ioannes, von Gots gnaden bischoff zw Culmmen und administrator des bisthumbs Pomezan