Denn ersamen, namhafftigen hernn ⌊burgermeister unnd [rathma]nnen der koniglichen stadt [Dantzig]⌋, unsern gunstigen frunden /
Unsernn fruntlichenn grues mit erbittung, was wir Ewr Erbarkeit liebs unnd nuczlichs wolgefallens umber werdenn wissenn zcwthun, / zcuvoran. / Ersame, namhafftige hernn, gunstige frunde unnd landsleutte. /
Wir habenn nicht mocht nochlossenn mit dissem botten, / wie woll behafft inn schwerer feurstroff, / die Gott der allemechtige umb unser sundt willenn uber uns hot gesendt, / Ewr Erbarkeit vor vil ehr und guts, uns negst inn unserm ⌊vatterland⌋ bewisenn, / mit allem fleiß zcwdanckenn. / Unnd dancken Euch dermossen, / das wir hoffenn, uns nummer undanckpar sollenn spurenn, / wie mit Gots hulff die czeit mit der tath wirt mith bringen, / bittend solche kleine dancksagung vor grosse woltath, aus guttem grundt unsers herczenn geflossenn, fruntlich wollenn uffnhemenn / und unser, / wor inne wir Ewr Erbarkeit vil wilfarung, / fruntschafft, nucz und ehr wustenn oder mochten zwerczegenn, / nicht zcwsparenn. / Vorsthenn uns der gleichenn zcw Ewr Erbarkeit uns mit orthlicher oder schrifftlicher furderung, / so sich was zcw besserem unnd hocherem stande zcwtruge, / dar inne wir Ewr Erbarkeit nuczlicher unnd fromlicher möchtenn sein, / nicht werdenn lossenn, / die wir Gotte dem allemechtigenn inn langweriger gesundtheit unnd gelugseligem zcwnhemenn thun befhelenn. /
Datum uff unserm slosse ⌊Lobaw⌋, denn 4. Julÿ 1533.
⌊Joannes⌋, bischoff zu ⌊Culmen⌋ manu propria
Postscript:
Wir habenn negst bey Ewr Erbarkeit gelossenn die copien der legationn ⌊furstlicher irlaucht⌋ unnd ⌊koniglicher maiestet⌋ antwurt, / welche denn ⌊hern⌋ uff negst vorgangenn ⌊tag⌋ genn ⌊Marienburg⌋ wardt zcwgeschickt, bittendt, wollet die selbigen denn andern hernn unnd stetten / und nemlich unserm libenn geistlichenn vatter, dem hern ⌊bischoff zcw Ermelandt⌋, / mit den ersten lossen zcwkomen etc.
