Reverendissimo in Christo patri et domino, domino Ioanni Dei gratia episcopo Culmensi, fratri et amico carissimo ac plurimum honorando

Reverendissime in Christo pater et domine frater et amice carissime et plurimum honorande.

Litteras Reverendissimae Dominationis Vestrae per parochum eius recepi gratissimas quidem mihi, verum de beneficiis qualibuscumque hic perceptis plus nimio gratias agentes. Non est profecto opus eam hospitalitatis meae tenuitatem tanto verborum splendore coornare, feci enim in eo officium et fratris et amici , dignetur Dominatio Vestra Reverendissima quicquid id fuit boni consulere. Oleum florum macis ut mihi est pergratum, ita pro eo Reverendissimae Dominationi Vestrae similiter et pro novitatibus mecum communicatis, quas et remitto, gratias multas ago. Quibus vero paria faciam, hac tempestate non habeo. Quid nobis capitulum nostrum in causa festivitatum atque etiam Reverendissimae Dominationis Vestrae responderit, ex indito litterarum illius exemplo intelliget. Ceterum ut Reverendissimam Dominationem Vestram Christus felicem et florentem servet ac in omnibus prosperet ex animo opto et precor.

Ex Heilsberg, 10 Aprilis anno 1533.

Vestrae Reverendissimae Dominationis bonus frater Mauritius episcopus Varmiensis subscripsit