Dem hochwirdigsten in Got ffursten unde hern, herren Ioanni, von Gotis genoden bisschoff zcum Culmenn unde administrator zcu Pomezann etc., meynem genedigen, hochgelibtennn herrennn.

Hochwyrdigster in Gott Fursste, Genediger Herre,

Ewer Vetterlichen Genoden seynt meyne gehorszame unde vorphlichte wyllige dynste myt besunderem fleys meynes hogesten vormogens alle zceytt zcu thun bereth unde bevalennn.

Genediger Herre.

Der almechtige Gott gebe Ewer Fursstlichen Genoden gluck unde hell zcu der beszithzcunge des bischstumbs, zcur szelenszelicheytt, myt einem gerugeden unde fredelichem regimente zcu langen tagennn, amennn.

Genediger Herre, zceytungen wes ich Ewer Ffurstlichen Genoden nicht zcu schreÿbennn, dann men szaget, das keyserlicher mayestet hobe gewonnen Marsilien von dem koningge von Ffranckreich, das vor langen joren der Krone vonn Polen zcugehorick ist geweszennn. / Was unns Danczker anlangende ist, Gott besszers, kan dy stadtt ken jor ane schaden bleybennn. Drey schiffe szeyn von Lunden mytt laken gekomen, / das vÿrde ist in dem Sunde geszunckennn VII fadem tyff, do nichts von widder komen wyrth. Got fuge dy anderen glucklich zcu haus.

Unde wyll mich hiemytt Ewer Ffurstlichen Genoden als meynem groszgunstigen hernn unde vater, dem ich vyll hell, lybes unde guttes zcu langen tagen wunsche, mytt allen meynen geflisszenen dinsten befholen haben myt holffe von Gote, der Ewer Ffurstlichen Genoden myt vormerungge gluckszeliger wolfarth unde zcunemunge alles gutten friste unde erholte.

Datum Danczke, am tage Sanctae Margarete anno 1537.

Ewer Furstlichen Genoden gehorszamer unde gutwylliger Macz Platen