Palatino Marienburgensi

Unsernn freuntlichenn grus mit aller wolfarth wunschung zuvorann.

Grosmechtiger her gunstiger freundt.

Ewer Herlichkeit eigenn handt schreibenn ist uns heute durch dersulbenn underthann / von der jumpe bohendiget worde[n] das uns sher angenem gewesen / und nicht mit geringen wolgefallen von uns gelesenn wordenn / dieweil wir daraus viel darnoch uns leng... vorlangt / vorstandenn. / Bodanckenn uns derwegenn freun[t]lich kegenn Ewer Herlichkeit / das die vor andernn uns mit ihrem schreibenn zubosuchenn / nicht nachgela[ssen] und habenn dersulbenn boger nach / den achtbarwirdigenn hernn Achatium von der Trancke thumherenn und dehant zur Frauenburg und landtprobst zum Allenstein vormocht und dahin boredt / das ehr von unser wegen und in unserm namen sich auf zukomenden mitwoche zu Ewer Herlichkeit kegen Morungenn bogebenn wirdt / mit welchem diesulbe alle sachenn wie ess zu Crakow vor dismol zugangen / auch was da gehandelt wordenn / mit allem anhengigen / vortraulich wie mit vnser person selbest redenn / und im an uns zutragen vortrauenn mugenn. Wir seindt auch hochlich Ewer Herlichkeit gesundenn ankunf[t] von Crakow erfreidt / / und das der almechtig Got lange gesuntheit dersulben vorleie / wunschen wir hertzlich / in des genedigenn schutz wir uns sampt unser gesuntheit / der besserung wir noch wenig entfinde[n] bovelenn.

Datum aus unserm schloss Heilsberg, den XXVI Augusti MDXLVIII.