Mathiae Platenn

Unsernn gunstigen grus {etc.} [v]nd alles gutts zuvor[a]n. / Erhaftiger be[s]under gutter freundt

Wir haben genugsam aus Ewrem schreiben Ewers swogers Cornelii sachen gelegenheit / und wie die durch Marten Banden das nehere mal bei koninglicher majestet vortgestellet und von dersulben auf zukomenden reichstag vorleget worden / vorstanden. Wolten auch gerne ferner Cornelium mit vnserenn vorschriftenn / die wir ihm nie vorsaget / vorshenn haben. Dieweil wir aber shen und vormerken / das die hernn / so die junge koningliche majestet etziren und in ihrer gewalt haben / der sachen widdrig / und dem kegenteil nahengig seindt / haben wir angezeigte vorschrifte / weil man der vorigen ... wenig gemeket ...en noch bei hofe sunder zweifel indehtig ist / unser sulbst verkleinung zumeiden / auszugeben vor dismol enthalten mussenn. / Und wollen dennoch nicht wo wir sunst mitler zeit unser geschefte halben an koninglichen hof schreiben werden der sachenn [wi]e wir auch zuvor [mi]t eigener handt ...han nicht vorgessenn. / Gabriel Therlle aber / der uns unsers voriges schreibenn boantwortet / haben wir widderum aufs new der sachen halben geschriben / und im die fleisig zufurderen gebetenn. / Welches wir hiebei geleget euch zuschickenn [v]nd bodancken uns [v]or die zugeschickten [z]eitungen / die uns angenem gewesen / wollet alwege wen euch was zukunft / und ihr [e]rfaret die uns zuzuschreiben nicht nachlassen. Gotlichenn genaden bouolen.

Datum aus unserm schloss Heilsberg den letzsten Iulii M D XLVIII